Dunyo va o‘zbek sportiga oid 27-sentabr kunining eng muhim xabarlari dayjesti bilan tanishing.
O‘zbekiston
O‘zbekiston milliy terma jamoasi oktabr oyida ikkita o‘rtoqlik o‘yini o‘tkazadiSrechko Katanes shogirdlari oktabr oyidagi FIFA kunlarida Iordaniyada yig‘in o‘tkazadi. Yig‘in davomida Srechko Katanes jamoasi 9-oktabr kuni Malayziya, 12-oktabrda esa Iordaniya terma jamoasi bilan o‘rtoqlik uchrashuvida maydonga tushadi.
Milliy gvardiya qo‘mondoni Rustam Jo‘rayev kamondan o‘q otish federatsiyasi raisligiga saylandi
Turizm va sport vazirligida 27-sentabr kuni kamondan o‘q otish federatsiyasining navbatdan tashqari kongressi bo‘lib o‘tdi. Unda bir qancha masalalar qatorida tashkilotga yangi rahbar saylandi. Federatsiya raisligiga Milliy gvardiya qo‘mondoni Rustam Jo‘rayev nomzodi ilgari surildi va u delegatlar tomonidan bir ovozdan ma’qullandi. Bunga qadar ushbu federatsiyaga Otabek Imomov rahbarlik qilardi.
Ma’lumot uchun, Milliy gvardiya qo‘mondoni 2020-yilning sentabr oyida O‘zbekiston huquqni muhofaza qilish organlarining qo‘l jangi federatsiyasi raisi etib saylangan edi.
Jahon
Top-5 ligalarda ochko yo‘qotmagan ikki klub qoldi25 va 26-sentabr kunlari qator ligalarda navbatdagi tur o‘yinlari bo‘lib o‘tdi. Kuchli beshlik ligalarida ayni vaqtga kelib faqat ikki jamoa g‘alabali seriya qayd etmoqda — “PSJ” va “Napoli”. Parijliklar Fransiya chempionatida qatorasiga 8 ta turdan beri g‘alaba qayd etmoqda, “Napoli” esa olti turdan beri ochko yo‘qotmayapti.
Eldor Shomurodov — Rim derbisida qatnashgan ilk o‘zbekistonlik futbolchi
“Roma” A Seriya 6-turida “Latsio”ga qarshi bahs olib bordi. “Olimpiko” stadionida kechgan bahsda “burgutlar” 3:2 hisobidagi g‘alabani qo‘lga kiritdi. Ushbu bahsning 67-daqiqasida Eldor Shomurodov zaxiradan maydonga tushdi. Shu tariqa Shomurodov Rim derbisida ishtirok etgan ilk o‘zbekistonlik futbolchi bo‘ldi.
Ronald Kuman “Atletiko”ga qarshi o‘yinni ham o‘tkazib yuboradi
“Barselona” bosh murabbiyi “Kadis”ga qarshi o‘yinda maydondan chetlatilgan va ikkita o‘yinga diskvalifikatsiya qilingandi. Shu sabab u La Liga 7-turi doirasidagi “Levante”ga qarshi bahsni (3:0) o‘tkazib yubordi.
Katalonlar mutaxassisning qizil kartochkasiga apellyatsiya bermadi. Shu tariqa niderlandiyalik mutaxassis 8-turdan o‘rin olgan “Atletiko”ga qarshi bellashuvni ham tribunadan kuzatishga majbur bo‘ladi.
Ansu Fati 323 kun deganda maydonga qaytdi va “Barselona” safida gol urdi
Katalonlar hujumchisi Ansumane Fati katta tanaffusdan keyin maydonga tushdi. Futbolchi La Liga 7-turi doirasida “Levante”ga qarshi kechgan bahsda zaxiradan maydonga tushdi va jamoasining uchinchi golini urdi.
Fati jarohat sabab umumiy 323 kunni o‘tkazib yubordi. 18 yoshli forvard o‘tgan mavsum boshida tizzasidan jiddiy jarohat olgan va ikki bor operatsiya qilingandi.
Messi “Manchester Siti”ga qarshi o‘yin oldidan mashg‘ulotlarga qaytdi
34 yoshli futbolchi tizzasidagi jarohat sabab parijliklarning ikkita o‘yinini o‘tkazib yuborgandi. 27-sentabr kuni Leo jamoaviy mashg‘ulotlarda qatnashgan. Xabarlarga ko‘ra, Messi YChL doirasida 28-sentabr kuni bo‘lib o‘tadigan “Manchester Siti”ga qarshi o‘yin qaydnomasiga kiritilishi mumkin.
UFC 267 doirasidagi ikkita jang bekor bo‘ldi
O‘ta yengil vazn toifasi chempioni Aljameyn Sterling Pyotr Yangga qarshi jangda ishtirok etolmaydigan bo‘ldi. Qayd etilishicha, Sterling bo‘ynidan olgan jarohati sabab jangda ishtirok eta olmasligi ma’lum bo‘lgan.
Shuningdek, ushbu musobaqa doirasidagi Islom Maxachev va Rafael dos Anyos o‘rtasidagi jang ham bekor bo‘ldi. Braziliyalik yakkakurashchi mashg‘ulot vaqtida jarohat olgan.
UFC 267 musobaqasi Toshkent vaqti bilan 31-oktabr tongida BAAdagi “Jangchilar oroli”da bo‘lib o‘tadi.
Izoh (0)