Qirg‘iziston Fanlar akademiyasining Biologiya instituti umurtqali hayvonlar laboratoriyasi rahbari Asqar Davletbakov 22-sentabr kuni o‘tkazilgan matbuot anjumanida mamlakatda Qizil kitobga kiritilgan jayronlar populyatsiyasi qirilib ketganini aytdi.
Qirg‘izistonda jayronlar Qizil kitobga kiritilgan va ularni ovlash taqiqlanadi. Jayronlar Qirg‘izistondan tashqari O‘zbekiston, Qozog‘iston va Eron hududlarida yashaydi.
Davletbakovning so‘zlariga ko‘ra, mamlakatda jayronlarning borligi ham, “ular Qirg‘izistonda mavjud bo‘lgani” ham butunlay “unutib qo‘yilgan”. Shuningdek, u kelasi oy O‘zbekistondan Qirg‘izistonga bir guruh jayronlarni olib kelish rejalashtirilganini aytdi.
“Ularni Qirg‘izistonda ushbu populyatsiyani tiklash uchun moslashtiramiz. Hozircha 15 bosh bo‘ladi, lekin har yili ularning sonini ko‘paytiramiz. Qozog‘iston va Ozarbayjon kabi davlatlar bilan muzokara o‘tkazamiz”, — dedi Davletbakov.
Biologiya instituti laboratoriya rahbarining qo‘shimcha qilishicha, jayronlar hatto Sovet Ittifoqi davrida, chorvachilik va dehqonchilik rivojlantirilayotgan paytda yo‘q qilina boshlagan.
“Bu juda ko‘p qarama-qarshilikni keltirib chiqargan, jayronlar tekislikda yashaydi. Ilgari ular Chuy vodiysida yashagan. Bugun ular umuman yo‘q, endi ularni boshqa mamlakatlardan olib kelishimizga to‘g‘ri keladi ”, — deya qo‘shimcha qildi Davletbakov.
Hayvonlar Qirg‘izistonga olib kelingandan so‘ng vaqtincha kushxonalarda — yarim bo‘sh joylarda saqlanadi. Davletbakovning ishontirishicha, korpus allaqachon tayyor va butun jarayon boshlangan, faqat hujjatlardagi rasmiyatchiliklarga rioya qilish kerak.
2019-yilda Qirg‘izistonda Qizil kitobga kiritilgan jayronlarni qayta ko‘paytirish rejalashtirilgan edi. O‘sha yili Atrof-muhitni muhofaza qilish davlat agentligining o‘sha paytdagi rahbari Mirslav Omonqulov shunday rejalar haqida gapirgan. Omonqulov jayronlarni Qozog‘istondan import qilish orqali populyatsiya qayta tiklanishini aytgan.
Izoh (0)