Rossiya tarkibidagi Kabarda-Bolqoriya Respublikasida joylashgan Elbrus tog‘iga chiqish paytida besh alpinist halok bo‘ldi, safarning 14 ishtirokchisini qutqarishga muvaffaq bo‘lindi. Qariyb 5400 metr balandlikdagi odamlarni qidirish va qutqarish bo‘yicha operatsiya yetti soatdan ortiq davom etdi, deb yozadi BBC Russia.
“Elbrus tog‘ida alpinistlar guruhidan, qidiruv-qutqaruv operatsiyasi chog‘ida, 14 kishi qutqarildi, ular ratraklarda (maxsus gusenitsali transport) Azau yalangligiga evakuatsiya qilindi va shifokorlarga topshirildi. Afsuski, besh kishi halok bo‘ldi”, — deya Rossiya Favqulodda vaziyatlar vazirligi “Interfaks”ga ma’lum qildi.
FVVning Kabarda-Bolqoriya bo‘yicha bosh boshqarmasi boshlig‘i Mixail Nadyojinning so‘zlariga ko‘ra, alpinistlarning ko‘pchiligi shikastlanishlar olgan. “Deyarli hammada kuchli sovuq oldirish borligi ma’lum. Ba’zilarning qo‘l-oyoqlari singan. Shifokorlar hozir ularni deyarli 4000 metr balandlikda ko‘zdan kechirmoqda”, — degan u “TASS”ga.
Nadyojinning aniqlik kiritishicha, qutqaruv operatsiyasi yakunlangan, u yetti soatdan ziyod davom etgan.
Turistlar guruhi Elbrus tog‘ida ob-havo yomonlashganidan keyin yordam so‘rab murojaat qilgan. “TASS” manbasiga ko‘ra, guruh Rossiyaning 11 ta hududidan cho‘qqiga chiqish uchun kelgan alpinistlardan iborat bo‘lgan. “Interfaks” manbasi aniqlik kiritishicha, alpinistlarning barchasi “30 yoshdan oshgan, asosan tajribaga ega bo‘lmagan” kishilardir.
Idora vakiliga ko‘ra, qutqarilganlar maxsus gusenitsali transport — ratraklarga o‘tqazilgan.
Guruh qariyb 5400 metr balandlikda bo‘lgan, bu yerda shamol tezligi bir soniyada 40 metrga yetgan, harorat — minus 20 daraja bo‘lgan. Atrofni ko‘rish qiyin bo‘lgan, bu qutqaruv operatsiyasini murakkablashtirgan. Shuningdek, guruh tarqalib ketgani ham qidiruvni yanada qiyinlashtirgan, deya hududiy FVV vakili “TASS”ga ma’lum qildi.
Operatsiyada 70 ga yaqin qutqaruvchi va 16 ta texnika qatnashdi. Tergov qo‘mitasi vakillari ma’lum qilishicha, alpinistlarning halok bo‘lishi holati yuzasidan tekshiruv boshlangan.
Yana bir o‘lim
Avvalroq qidiruv-qutqaruv otryadi vakili “TASS”ga guruhni ularga hamrohlik qilgan gidlardan biri tashlab ketganini ma’lum qilgandi. “Odamlarni tog‘ga olib kelgan gid ularni tashlab, pastga tushib ketgan, biz uni yo‘lda uchratib qoldik. Bizdan pastroqda ikkita chiroq ko‘rinyapti, ularni ham qutqaramiz, deb umid qilamiz”, — degan edi u.Ammo cho‘qqiga chiqishni tashkillashtirgan Denis Alimov, Elbrus.guide klubi a’zosi “TASS” va “Interfaks”ga ma’lum qilishicha, guruhga to‘rt nafar professional alpinist hamrohlik qilgan, ular odamlarni qutqarish uchun qo‘lidan kelganicha harakat qilgan.
Alimovning so‘zlariga ko‘ra, guruhda dastlab 20 kishi — 16 nafar safar ishtirokchisi va to‘rt gid bo‘lgan. Guruh yo‘lga chiqqanida kuchli shamol bo‘lgan, ammo ob-havo barqaror bo‘lgan, kechikishlar bo‘lmagan.
Cho‘qqiga ko‘tarilish chog‘idagi ilk muammolar guruhdagi ayollardan birining ahvoli yomonlashganidan keyin boshlangan. O‘shanda hamrohlik qiluvchilardan biri qiz bilan Elbrus beliga tusha boshlagan, qolganlar esa cho‘qqiga qarab yo‘lni davom ettirgan.
Alimovning aytishicha, undan keyin nima bo‘lganini u qizga hamrohlik qilgan giddan eshitgan. “Uning aytishicha, yarim soatdan keyin ob-havo keskin yomonlashgan, shamol pastdan tepaga esa boshlagan, bo‘ron boshlangan. Bosim keskin pasaygan bo‘lsa kerak, chunki ancha pastga tushgandan keyin ham qizning ahvoli yomonlashgan. U hushidan ketgan va bir soat ichida gidning qo‘lida vafot etgan”, — dedi u.
Alimovning aniqlik kiritishicha, qiz 11:00—12:00 atrofida hayotdan ko‘z yumgan. Shundan keyin gid uning jasadi turgan joyga belgi sifatida ryukzakni qo‘yib, guruhning qolgan a’zolarini kuta boshlagan. Safar ishtirokchilari o‘z vaqtida pastga tushmagani tufayli, 15:00 atrofida u lager bilan bog‘langan va o‘zi tog‘dan tusha boshlagan. So‘ng u FVV qutqaruvchilarini chaqirdi.
Guruh uch qismga bo‘lindi
Bu vaqtda, Alimovning tushuntirishicha, cho‘qqiga yo‘l olgan safar ishtirokchilaridan biri oyog‘ini sindirib olgan. Buning ustiga ob-havo ham keskin yomonlasha boshlagan. “Ehtimol, shu sababli guruh vaqt yo‘qotgan, havo o‘ta yomonlashgan”, — dedi Alimov “TASS”ga.Shunda safar ishtirokchilari bo‘linishga qaror qilgan, tezroq yetib bora oladiganlar sekinroq yuradiganlarni kutmasligi uchun. “Ular guruhni uchga — tezroq va sekinroq yuradiganlarga bo‘lgan, — deb hikoya qiladi Alimov. — Tog‘dan tushishda guruhlardan biridagi yana ikki kishi halok bo‘lgan. Biroq bo‘linish qarori to‘g‘ri bo‘lgan, aks holda qurbonlar ko‘proq bo‘lishi mumkin edi”.
Safar tashkilotchisi aytib berishicha, gidlar kuchli sovuq sabab sog‘ligini yo‘qotgan va shikastlangan. “Ulardan birining ko‘zi deyarli ko‘r bo‘lib qolgan, qor uning ko‘zini kuchli yaralagan”, — dedi Alimov.
Ma’lumot uchun: Elbrus — Rossiyadagi eng baland tog‘ cho‘qqisi. Uning balandligi dengiz sathidan 5642 metrni tashkil etadi.
Izoh (0)