Galaxy S22 modeli Samsung’ning eng kichik flagmaniga aylanadi
Samsung’ning yangi modeli iPhone 13 dan kichikroq o‘lchamga ega bo‘ladi. Bu haqda Ice Universe niki ostidagi taniqli insayderga tayanib Hi-Tech.Mail.ru xabar berdi.
Samsung’ning yangi lineykasida alohida mini versiya paydo bo‘lishini kutish kerak emas, albatta, ammo bazaviy model ekrani baribir kichrayadi: hozirda Galaxy S21 dagi 6,2 dyuym o‘rniga 6,06 dyuym.
Agarda bu rost bo‘ladigan bo‘lsa, Samsung’ning yangi lineykasidagi bazaviy model kompaniyaning so‘nggi yillardagi eng kichik flagmaniga aylanadi.
Insayderning Twitter’dagi postida, shuningdek, ikki smartfon taqqoslangan surat ham mavjud: iPhone 12 va Galaxy S22. Ixchamligi bo‘yicha ikkinchisi oldinda, uning uzunligi, eni va balandligi biroz katta. Eslatib o‘tamiz, iPhone 12 va yaqinda taqdim etilgan iPhone 13 ning ekrani o‘lcham borasida bir-biridan farq qilmaydi — ikkala smartfonga ham 6,1 dyuymli displey o‘rnatilgan.
Samsung flagmani o‘lchamining kichrayishi gadjetning avtonomligiga ham ta’sir ko‘rsatadi. Insayder bergan ma’lumotlarga ko‘ra, Galaxy S22 ga kichikroq akkumulyator o‘rnatiladi — uning sig‘imi 3700 mA/soatga qadar kichrayadi. Shunga qaramay, Galaxy S21 ning akkumulyator sig‘imi 4000 mA/soatni tashkil etadi.
Avvalroq xitoylik ikki insayder Samsung kompaniyasi yaqin kunlarda 200 megapikselli mobil sensorni taqdim etishi va u 2022-yilda sotuvga chiqadigan Galaxy S22 flagmanlariga o‘rnatilishini ma’lum qilgandi.
