Toshkent viloyatida YPX xodimi sifatida faoliyat yuritgan serjant Dilmurod O‘rmonov mast haydovchi boshqaruvidagi mashina urib ketishi oqibatida vafot etdi. Bu haqda viloyat IIBB axborot xizmati xabar qildi.

Foto: Toshkent viloyati IIBB

Ma’lum qilinishicha, 2021-yilning 11-sentabr kuni Toshkent viloyatida jinoyatchilikning oldini olish yuzasidan o‘tkazilayotgan profilaktik tadbir davomida Piskent tumani hududida xizmat burchini bajarayotgan YPX inspektori serjant Dilmurod O‘rmonov, haydovchi 1992-yilda tug‘ilgan Sh.A. (mastlik holatida) boshqaruvidagi Lacetti avtomashinasiga to‘xtash ishorasini beradi.

Haydovchi esa IIO xodimining qonuniy talabiga bo‘ysunmay harakatni davom ettirgan va 1991-yilda tug‘ilgan Piskent tumani IIB YHXB qidiruv va surishtiruv bo‘yicha inspektori, serjant Dilmurod O‘rmonovni urib yuborib YTH sodir etadi.

Oqibatda ko‘rsatilgan tibbiy muolajaga qaramay serjant Dilmurod O‘rmonov olgan tan jarohatlari bilan shifoxonada 14-sentabr kuni vafot etdi.

Toshkent viloyati YXHBning “Daryo”ga ma’lum qilishicha, haydovchiga nisbatan jinoiy ish ochilgan.