Livan prezidenti Mishel Aun va bosh vazir etib tayinlangan Najib Mikati respublikaning 24 vazirdan iborat yangi hukumati tarkibini kelishib oldi. Bu haqda prezident saroyi Baabdadagi manbasiga tayanib, “TASS” xabar berdi.
“Davlat rahbari bugun (10-sentabr) Vazirlar Mahkamasining tarkibini tasdiqlashi va farmonga imzo chekishi mumkin. Bosh vazir Mikatining yaqin soatlarda Baabda saroyiga kelishi kutilmoqda”, — dedi “TASS” manbasi.
Manbaga ko‘ra, asosiy vazirlarning ismlari o‘tgan haftada ma’lum bo‘lgan: Abdulla Bu Xabib (nasroniy-maronit) respublika tashqi ishlar vaziri lavozimini egallaydi, Moris Slim (pravoslav) mudofaa bo‘limini boshqaradi, Yusuf Xalil (shia musulmon) moliya vaziri etib tayinlanadi, shuningdek, sunniylar jamoasidan iste’fodagi general Marvan Zeyn Ichki ishlar vazirligining rahbari bo‘ladi.
“Vazirlar Mahkamasini tuzishning kechikishiga iqtisodiyot vaziri lavozimiga nomzod tanlash cho‘zilib ketgani sabab bo‘ldi, ushbu lavozim egasi islohotlar va rekonstruksiya jarayonida asosiy rol o‘ynaydi. Hozir tanlov Amina Salyamda to‘xtagan, u vazirlikni boshqarishi mumkin”, — dedi manba. Uning so‘zlariga ko‘ra, Livan davlat universitetining jurnalistika fakulteti sobiq dekani Jorj Kallas axborot vaziri bo‘ladi.
Livandagi vaziyat
Bayrut dengiz portida sodir bo‘lgan fojiali portlash fonida Hasan Diab boshchiligidagi texnokratlar kabineti iste’foga chiqqandan so‘ng, Livan 2020-yilning 10-avgustidan beri hukumatsiz qolmoqda. Sobiq bosh vazir, sunniylardan bo‘lgan siyosatchi Saad Haririy o‘n oy davomida prezident bilan vazirlik lavozimlarini musulmonlar va nasroniylar o‘rtasida taqsimlash to‘g‘risida kelisha olmadi, natijada u 15-iyulda iste’foga chiqdi.
26-iyul kuni prezident Aun Livan shimolidagi Tripoli shahri deputati Najib Mikatini bosh vazir etib tayinladi va unga yangi hukumat tuzishni topshirdi. Davlat rahbarining Baabda saroyida bo‘lib o‘tgan parlament fraksiyalari bilan maslahatlashuvlaridan so‘ng, Mikatining nomzodi qonun chiqaruvchi hokimiyatning 115 a’zosidan 72 nafari tomonidan qo‘llab-quvvatlandi.
65 yoshli siyosatchi va tadbirkor Najib Mikati Livan hukumatini ikki marta boshqargan: birinchi safar 2005-yilda sobiq bosh vazir Rafik Haririy o‘ldirilganidan keyin, ikkinchi safar 2011—2014- yillarda qo‘shni Suriyadagi inqiroz paytida yuzaga kelgan keskin siyosiy qarama-qarshiliklar davrida.
Izoh (0)