Qaysi aktrisa 2021-yilda eng badavlat deb topilgan va bunga qanday qilib erishgan?

Forbes’ning ma’lum qilishicha, Riz Uizerspun dunyodagi eng badavlat aktrisa bo‘lgan. Ushbu maqomga u ko‘p millionli shartnomalar bois emas, prodyuserlik faoliyati tufayli erishgan. Ro‘yxatda yetakchilik qilishga katta gonorar va blokbasterlarda suratga tushish sabab bo‘lmagan.

Aktrisa “Katta, kichik yolg‘on” (Big little lies), “Hamma yerda yong‘in” (Little fires everywhere) va “Tonggi shou” (The Morning Show) singari mashhur seriallarni taqdim qilgan Hello Sunshine kompaniyasini 900 million dollarga sotgan. Ushbu kelishuvdan keyin Rizning moliyaviy ahvoli 400 million dollarga baholanmoqda. Aktrisaning kompaniyasini sobiq Disney rahbarlari Kevin Mayer va Tom Staggslar boshqaradigan mediakorxona sotib olgan.

Shunga qaramay, Riz va Hello Sunshine’ning ijrochi direktori Sara Xarden direktorlar kengashiga kiradi hamda kompaniyani boshqarishda davom etadi. Loyihani Blackstone investitsion korporatsiyasi moliyalashtiradi.

Riz Hello Sunshine kompaniyasiga 2016-yilda asos solgan. U voqea markazida ayol qahramonlar va ularning tajribasi bo‘ladigan film hamda seriallar taqdim qilishni istagan. Bu qilgan qarori darhaqiqat to‘g‘ri bo‘lib chiqqan. Kompaniyaning loyihalari katta foyda keltirgan va aktrisaning biznes borasida muvaffaqiyatga erishishiga sabab bo‘lgan. Gollivuddagi insayderlarning aytishicha, Riz serialning o‘zi suratga tushgan har bir epizodi uchun 1 million dollar oladi. Aktrisa, shuningdek, katta miqdordagi gonorar evaziga reklamada faol suratga tushadi.

Forbes tomonidan tuzilgan ro‘yxatga ko‘ra, Jeymi Gers dunyodagi eng badavlat aktrisa deb topilgan. Ismi va kinodagi faoliyati bilan mashhur bo‘lmagan ayol milliarder Entoni Resslerning rafiqasi ekani bilan ko‘proq ma’lum. U 3 milliardga baholanadigan moliyaviy ahvoliga turmush o‘rtog‘i sabab erishgan.

Moliyaviy ahvoli 500 million dollarga baholanadigan opa-singil Meri-Keyt va Eshli Olsenlar reytingda ikkinchi o‘rinni egallagan. Kinoda suratga tushmay qo‘yganiga ancha bo‘lgan Olsenlar ayni vaqtda dizaynerlik bilan shug‘ullanadi. Ular The Row nomli kiyim brendiga egalik qiladi.

Opa-singillardan keyin ro‘yxatda Riz, undan so‘ng esa moliyaviy ahvoli 350 million dollarga baholanadigan Jessika Alba keladi. Oxirga vaqtda filmlarda kam suratga tushayotgan Alba Honest Beauty kosmetik brendiga asos solgan.

2021-yilning eng badavlat aktrisalari reytingidan, shuningdek, Juliya Roberts (250 million dollar), Jennifer Eniston (240 million dollar), Sandra Bullok (220 million dollar), Jeyn Fonda (200 million dollar) va Mayli Sayrus (160 million dollar) ham o‘rin olgan.