Fotoreportaj: “Tolibon” qo‘liga o‘tgan Afg‘onistonda nimalar sodir bo‘lmoqda?
“Tolibon” 15-avgust kuni Afg‘oniston ustidan to‘liq nazorat o‘rnatganini e’lon qildi, respublika prezidenti Ashraf G‘ani chet elga qochib ketdi. “Tolibon” qo‘liga o‘tgan mamlakatda nimalar ro‘y berayotgani haqida “RBK” fotoreportaj tayyorladi.
“Tolibon” Afg‘oniston poytaxti Kobulda. “Tolibon”ning da’vo qilishicha, ular Kobulda tartibsizliklar va talon-torojlar bo‘lishiga yo‘l qo‘ymaslik uchun shaharni egallagan, chunki hukumat xavfsizlik kuchlari Kobulni tark etgandi. Birlashgan Millatlar Tashkiloti ilgari jangarilar bosib olgan hududlarda zo‘ravonlik va sudsiz qatl qilish hollari haqida xabar bergan.Foto: Twitter
Afg‘oniston aholisi “Tolibon” rahbarligi ostida yashashga tayyorlanmoqda. Mahalliy fuqaro dunyoviy kiyimdagi ayollarning suratlarini devorlardan o‘chirib tashlamoqda. “Tolibon” mamlakatdagi barcha ayollar paranji kiyishi shartligini e’lon qilgandi.Foto: Twitter
Kobuldagi xorijiy elchixonalar oldida odamlar navbatda turibdi.Foto: Twitter
Kobuldagi AQSh elchixonasi yonidan tutun ko‘tarilmoqda. AP manbalarining xabar berishicha, amerikaliklar elchixona tomida maxfiy hujjatlarni yoqishmoqda. CNN xabariga ko‘ra, 15-avgust kuni AQSh mamlakatda qolgan diplomatlarini evakuatsiya qilishni boshlagan.Foto: AP Photo
Qandahor politsiyasining sobiq rahbari Tadin Xon Hindistonga qochib ketdi. Yuqorida Xonning Nyu-Dehlidagi Indira Gandi xalqaro aeroportida olingan surati.Foto: Twitter
Kobulni egallashdan oldin “Tolibon” tarafdorlari Afg‘oniston sharqidagi Nangarhor viloyatining ma’muriy markazi Jalolobodni jangsiz bosib oldi. Bu hukumat nazorati ostidagi poytaxtdan tashqari so‘nggi muhim nuqta edi. Jalolobod gubernatori qon to‘kilishiga yo‘l qo‘ymaslik uchun shaharni topshirdi.Foto: EPA
Ayni vaqtda Kobul: shahar markazi kimsasiz qolgan, aeroportga olib boradigan yo‘llarda tirbandlik yuzaga kelgan. “Tolibon” barcha chegara punktlarini egallab olganidan so‘ng endilikda mamlakatni faqat poytaxt aeroporti orqali tark etish mumkin.Foto: Twitter
Kobulda “tartibsizliklarni bostirish” uchun soat 21:00 dan boshlab komendantlik soati joriy etildi. “Tolibon” patrullari ko‘chalarda kuzatuv olib bormoqda, jangarilar qo‘lida qurol bilan ko‘rgan kishisini “qattiq jazolashni” va’da qilgan.Foto: Twitter
Izoh (0)