Xitoy Litvadagi elchisini chaqirib oldi
Xitoy Litvadagi elchisini chaqirib olayotganini e’lon qildi. Bu haqda mamlakat Tashqi ishlar vazirligi ma’lum qilgan, deya xabar berdi “TASS”. Mazkur qarorga Vilnyusning Tayvan vakolatxonasini ochishni rejalashtirgani sabab bo‘lgan.
Xitoy TIV e’lon qilgan xabarda XXRning ogohlantirishlariga qaramay Litva hukumatining Tayvan ma’muriyatiga o‘z vakolatxonasini ochishga ruxsat bergani, diplomatik ogohlantirish va taqdimnomalarni nazar-pisand qilmagani qayd etilgan.
“Xitoy hukumati ushbu qarorga o‘z noroziligini bildiradi va Litvadagi elchisini chaqirib oladi”, — deyiladi vazirlik bayonotida.
Shuningdek, Pekin Litva hukumatiga murojaat qilib Xitoydagi elchisini javob tariqasida Vilnyusga qaytarishni so‘ragan.
Pekin Vilnyusning harakatlarini ikki davlat o‘rtasidagi munosabatlar o‘rnatilishiga to‘sqinlik qilishi va Xitoy suvereniteti hamda hududiy yaxlitligiga zarar yetkazishini qayd etgan.
Litva Tashqi ishlar vazirligi 20-iyulda Tayvanning yoz oxiriga qadar mamlakatda vakolatxona ochmoqchiligini e’lon qilgan. Xitoydagi orol ma’muriyati vakili Tsay Inven ham ushbu axborotni tasdiqlagan. Mart oyida Litva hukumati kuzda Tayvanda savdo-iqtisodiy vakolatxona ochmoqchi ekanligini bildirgan. Xitoy TIV ushbu rejalarni qoralagan va boshqa mamlakatlarning ham Tayvan bilan to‘g‘ridan to‘g‘ri aloqa o‘rnatishga urinishiga qarshi ekanligi haqida bayonot bergan.
1949-yilda fuqarolar urushida mag‘lub bo‘lgan Chan Kayshi (1887—1975) rahbarligidagi Gomindana kuchlarining omon qolgan qismi Tayvanga qochgan va hudud o‘z administratsiyasi tomonidan boshqariladi. Tayvan shundan buyon o‘z bayrog‘i va kommunistlar boshqaruvga kelgunigacha alohida davlat bo‘lgan Xitoy Respublikasidan qolgan boshqa ramzlarini saqlab qolgan. Pekin orolni Xitoy provinsiyalaridan biri deb hisoblaydi.
