Toshkentda 7 yoshli farzandi bilan ko‘chada qolgan ayol o‘z xonadoniga qaytarildi
Toshkentda 7 yoshli bolasi bilan ko‘chada qolgani aytilgan ayolning holati Senat tomonidan nazoratga olingani haqida xabar berilgandi. Holat Senatning Xotin-qizlar va gender tenglik masalalari qo‘mitasida o‘rganib chiqilib, quyidagilar aniqlandi.
Videoda 7 yoshli farzandi bilan ko‘chada qolgani aytilgan Sh.Z. 1983-yilda Namangan viloyatining Chust tumanida tug‘ilgan. U 2007-yilda Chust tumani “Olmos” mahallasiga kelin bo‘lib tushgan va o‘rtada farzand bo‘lmagani tufayli birinchi turmushidan ajrashgan. Ayol 2009-yil Toshkent viloyati, Chirchiq shahriga ishlash maqsadida kelganida o‘zi bilan issiqxonada birga ishlagan 1981-yilda tug‘ilgan A.A.ga shar’iy nikoh bilan turmushga chiqqan. Ular 2014-yilda qiz farzandli bo‘lgan.
Shundan so‘ng Sh.Z. 2018-yil o‘zaro oilaviy kelishmovchilik sabab ota-onasining uyiga, Namangan viloyatiga qaytib kelgan. Ruhiyatidagi o‘zgarishlar sabab 2018-yilning aprel oyida To‘raqo‘rg‘on tumanida joylashgan ruhiy kasalliklar shifoxonasida davolangan.
Kasalxonadan chiqqandan so‘ng, 1 hafta ota-onasi bilan birga yashab, ularning qarshiligiga qaramay qizi bilan birga turmush o‘rtog‘i A.A. oldiga ketgan. 2020-yilda oilaviy nizolar sabab farzandi bilan uydan chiqib ketgan.
Ijtimoiy tarmoqlar orqali tarqalgan ma’lumotlardan so‘ng ayol farzandi bilan Toshkent shahar, Yunusobod tumani mahalla faollari va ichik ishlar organlari xodimlari tomonidan topilib, tumandagi “Otchopar-1” mahallasida mavjud oilaviy yotoqxonaga vaqtincha joylab qo‘yilgan. So‘ng ayol shaxsiga aniqlik kiritilib, oila a’zolariga xabar berilgan, natijada Sh.Z.ning singlisi N.N. va hamda ukasi E.Z. 2021-yilning 2-avgust kuni opasi Sh.Z.ni 7 yoshli farzandi bilan sog‘-salomat Namangan viloyati Chust tumaniga olib ketgan.
Ta’kidlanishicha, hozirda ayol ota-onasi bilan birga yashab kelmoqda. Bugungi kunda uning bandligini ta’minlash maqsadida “Baymoqli” MFY tomonidan mahallada yashovchi tikuvchi X.T.ga ustoz-shogird an’anasi bo‘yicha biriktirildi. Shuningdek, ayolning farzandi Namangan viloyati Chust tumanidagi 14-umumta’lim maktabining 1-sinfiga o‘qishga qabul qilinishi uchun ro‘yxatga qo‘yildi.
Bundan avval O‘zbekistonda yangi mehribonlik uylarini ochmaslik taklif etilgani, Shavkat Mirziyoyev “yoshlar daftari” orqali o‘z ishini boshlagan Aziza Samig‘ovaga 3 xonali uy sovg‘a qilgani hamda Toshkentda yo‘l chetida ayolga kuch ishlatib, sochidan tortgan erkak videosi yuzasidan ma’lumot berilgani haqida xabar berilgandi.
