Tokio—2020 Olimpiadasida bir qator o‘zbekistonlik sportchilar 5-avgust kuni o‘z ishtirokini o‘tkazmoqda.
Erkin kurash bo‘yicha -86 kg vazn toifasida Javrail Shapiyev bronza medali uchun o‘tish jangida shveysariyalik Stefan Richmutga qarshi bahs yuritdi va 5:2 hisobida g‘alaba qozondi. Endilikda u Olimpiada bronzasi uchun bahsda rossiyalik Artur Nifonovga qarshi kurashadi. Ushbu bellashuv Toshkent vaqti bilan 15:50 dan keyin boshlanadi.
-74 kg vaznda Bekzod Abdurahmonov 1/8 finalda Puerto-Riko vakili Franklin Gomesni 10:0 hisobida yengib, chorak finalga yo‘l olgandi. Biroq Bekzod 1/4 finalda rossiyalik ikki karra jahon chempioni Zaur Sidakovga yengildi. Shu tariqa endi agar rossiyalik sportchi finalga chiqsagina, Abdurahmonovda bronza uchun imkoniyat bo‘ladi.
-57 kg vaznli kurashchi G‘ulomjon Abdullayev esa amerikalik raqibiga 1:11 hisobida yutqazib, musobaqa bilan xayrlashdi.
Yengil atletikaning balandlikka sakrash yo‘nalishida Safina Sa’dullayeva va Svetlana Radzivil kurashlarga kirdi. Radzivil o‘z ishtirokini saralashda yakunlagan bo‘lsa, Sa’dullayeva medallar o‘ynaladigan final bosqichga yo‘l oldi.
Shuningdek, ayni damda Yekaterina Voronina (yengil atletika, ko‘pkurash) va Alise Fahrutdinov hamda Aleksandr Savkin (zamonaviy beshkurash) musobaqalarda ishtirok etmoqda.
Izoh (0)