Jons Hopkins universiteti ma’lumotlariga ko‘ra, dunyoda koronavirus bilan kasallanganlar soni 199 566 049 kishini tashkil qilmoqda, 4 245 640 kishi vafot etgan. COVID-19 bilan kasallanish holatlari soni bo‘yicha AQSh (35,2 million), Hindiston (31,7 million), Braziliya (19,9 million), Rossiya (6,25 million) va Fransiya (6,24 million) oldinda bormoqda.

Shanxay

Foto: EPA

Qozog‘istonda koronavirus infeksiyasi va pnevmoniyadan o‘lim darajasi bo‘yicha sutkalik antirekord qayd etildi.

2-avgust holatiga ko‘ra, koronavirus tasdiqlangan odamlar orasida o‘lim holatlari 124 tani tashkil qildi. Yana 25 kishi manfiy natijali PZR-testga ega bo‘lgan holda pnevmoniyadan vafot etdi. Bir kun avval COVID-19 va pnevmoniyadan vafot etganlarning umumiy soni 126 kishini tashkil etgan edi.

Shuningdek, so‘nggi bir kecha-kunduzda 7519 kishida koronavirus va pnevmoniya aniqlangan. Bir kun avvalgi ko‘rsatkich 7481 taga teng edi. Shu tariqa mamlakatda pandemiya boshidan buyon kasallanganlar soni 602 952 kishiga yetdi.

Nyu-Yorkda restoran yoki trenajyor zaliga kirishda koronavirusga qarshi emlanganlikni tasdiqlovchi hujjatni talab qilish boshlanadi.

“Agar jamiyat hayotida to‘la-to‘kis ishtirok etmoqchi bo‘lsangiz, emlanishingiz kerak. Yopiq restoranlar va trenajyor zallariga, shuningdek, Nyu-Yorkdagi yopiq binolarda o‘tkazilayotgan konsertlar va tomoshalarga kirish uchun siz COVID-19’ga qarshi emlanganligingizni tasdiqlashingiz kerak bo‘ladi. Bu shahrimiz xavfsizligini ta’minlash bo‘yicha o‘ta muhim talab”, — deb yozdi shahar meri Bill de Blazio Twitter’da.

Nyu-Yorkda so‘nggi bir kecha-kunduzda 1288 kishida koronavirus aniqlangan, 75 kishi kasalxonaga yotqizilgan.

Nyu-York AQShda umumiy ovqatlanish muassasalarida vaksinatsiyani tasdiqlovchi hujjat talab qilinadigan birinchi shaharga aylandi. Ushbu talab 16-avgustdan kuchga kiradi, 13-sentabrdan esa uning bajarilishini shahar hukumati tekshirishni boshlaydi.

Koronavirusga qarshi to‘liq emlangan va turistik vizasi bo‘lgan shaxslar endi majburiy karantindan o‘tmagan holda Saudiya Arabistoniga kirishi mumkin.

Ammo bu “Sputnik V” bilan emlanganlar uchun amal qilmaydi: Saudiya Arabistonida bu vaksina tan olinmagan. Faqat Oxford/AstraZeneca, Pfizer/BioNTech, Moderna va Johnson & Johnson vaksinalaridan biri bilan emlangan sayohatchilargina mamlakatga kiritiladi.

Bundan tashqari, Sinopharm yoki Sinovac bilan emlangan turistlar ham kirishi mumkin, ammo ular qirollikda ma’qullangan vaksinalardan biri bilan qo‘shimcha bitta doza olishi kerak bo‘ladi. Shuningdek, barcha sayyohlarda 72 soat ichida olingan manfiy natijali PZR-test bo‘lishi kerak.

Xitoyda koronavirusga chalinish bo‘yicha yangi holatlar qayd etildi. Hukumat ko‘rayotgan profilaktika choralariga qaramasdan, 3-avgust kuni 96 kishida COVID-19 aniqlandi, shularning 25 nafari chet eldan kirib kelgan shaxslar. O‘lim holatlari qayd etilmagan.

Bir kun avval (2-avgust) 61 kishida virus aniqlangan edi.

Kasallanish holatlari Szyansu, Xunan, Xubey, Shandun, Yunnan, Xenan va Futszyan provinsiyalarida qayd etilgan. Bemorlar sonining o‘sishini ekspertlar delta shtamm tarqalishi bilan bog‘lamoqda.

Mamlakat ichida infeksiya tarqalishi bo‘yicha birinchi o‘rinda Juyli (Yunnan provinsiyasi), ikkinchi o‘rinda esa Nankin (Szyansu provinsiyasi) shaharlari bormoqda. Juylida virus iyul oyida qo‘shni Myanmadan o‘tgan bo‘lsa, Nankinda esa chet eldan yetib kelgan avialaynerlarni tozalash bilan shug‘ullangan aeroport xodimlari virus tarqatuvchiga aylandi.