UFC’dagi 3-jangini o‘tkazadigan Zarrux Adashev, Tokioga o‘zi bilan osh olib ketgan o‘zbekistonlik sportchilar va Mbappega katta mukofot taklif qilgan “Real”. Eng so‘nggi sport yangiliklari

Dunyo va o‘zbek sportiga oid 31-iyul kunining muhim xabarlari dayjesti bilan tanishing.

O‘zbekiston

Tokioda bo‘lib o‘tayotgan Olimpiya o‘yinlarining sakkizinchi kungi bahslari ortda qoldi. Bahslarda ikki nafar nafar o‘zbekistonlik sportchi ishtirok etdi. Shuningdek, dzyudo bo‘yicha O‘zbekiston terma jamoasi bahslarga kirishdi. Bokschilar Shahobiddin Zoirov va Elnur Abduraimov 1/4 finalga yo‘l olgan bo‘lsa, Muxtasar Tohirova o‘q otish bo‘yicha Olimpiadani 30-o‘rinda yakunladi. Dzyudochilar esa Niderlandiya terma jamoasiga mag‘lub bo‘lib, dastlabki bosqichdayoq musobaqa bilan xayrlashdi.

O‘zbekiston futzal milliy terma jamoasi Tailand mezbonlik qilgan Continental xalqaro o‘rtoqlik musobaqasida 3-o‘rinni egalladi. Umumiy hisobda 8 ta jamoa ishtirok etgan musobaqaning guruh bosqichidan ikkinchi o‘rin bilan chiqqan Bahodir Ahmedov shogirdlari yarim finalda Eron vakillari bilan to‘qnash keldi va 5:7 hisobida yengildi. 3-o‘rin uchun kechgan o‘yinda esa o‘zbekistonlik futzalchilar Misrni 4:0 hisobida taslim etdi.

Olimpiya o‘yinlarida ishtirok etayotgan o‘zbekistonlik sportchilar o‘zi bilan birga 500 banka yarim tayyor qadoqlangan osh va 200 tacha non olib ketgan, deya yozadi Rossiyaning “TASS” nashri.

“Biz o‘zimiz bilan palov olib keldik, Samarqandcha va an’anaviy. Hammasi bo‘lib 500 ga yaqin banka. 200 tacha non va mol go‘shti ham. Biz Olimpiya qishlog‘idagi boshqa sportchilarga ham ilinyapmiz. Misol uchun, yaqinda rus sportchilariga bir nechta non berdik”, – deydi “TASS” bilan suhbatda bo‘lgan O‘zbekiston delegatsiyasi vakili.

O‘zbekistonlik UFC jangchisi Zarrux Adashev 1-avgust tongida promoushendagi uchinchi jangini o‘tkazadi. Unga Rayan Benua raqiblik qiladi. Adashevning jangi 03:20 lar atrofida start olishi kutilmoqda.

Jahon

“Real” Kilian Mbappening erkin agent sifatida Madridga kelishi uchun 40 million yevro bonus bermoqchi. Bu haqda Marca xabar berdi. Hozirda “PSJ” va “qirollik klubi” futbolchi borasida muzokara o‘tkazmoqda. Mbappening parijliklar bilan amaldagi shartnomasi 2022-yilda o‘z nihoyasiga yetadi.

Mbappe “PSJ” bilan yangi shartnoma imzolashni xohlamayotgan bir vaqtda “Real” futbolchi agar jamoaga erkin agent maqomida keladigan bo‘lsa, unga 40 million yevro miqdorida ko‘tarma puli va’da qilgan.

Dik Advokat Iroq terma jamoasi bosh murabbiyi etib tayinlandi. U ushbu lavozimda sloveniyalik mutaxassis Srechko Katanetsning o‘rnini egallaydi. Advokat murabbiylik faoliyati davomida Niderlandiya, BAA, Janubiy Koreya, Belgiya kabi jamoalarni boshqargan.

“Barselona” Antuan Grizmann va Filippe Koutinyoni jamoada olib qolmoqchi. Mundo Deportivo xabariga ko‘ra Katalonlar bosh murabbiyi Ronald Kuman ularga ishonch bildirmoqchi. Niderlandiyalik mutaxassis kelasi mavsumda har ikkala futbolchi jamoada muhim rol o‘ynaydi degan fikrda.