Shavkat Mirziyoyev 28-iyul kuni Toshkent shahridagi 21-mehribonlik uyiga tashrif buyurdi va bu yerdagi sharoitlar bilan tanishdi.
Prezident bolalarni imkon qadar oilaga yaqin muhitda tarbiyalash kerakligini ta’kidlab o‘tdi.
“Ochiq aytish kerak, bugungi kunda xalq ta’limi tizimiga qarashli mehribonlik uylari va bolalar shaharchalaridagi tarbiyachilarning 95 foizi ayollar bo‘lib, bolalar ularni ona deb chaqirishadi.
Lekin, ota tarbiyasi-chi? Bu yerdagi farzandlarimizni oilaga imkon qadar yaqin muhitda tarbiyalashimiz uchun, albatta, ota va ona mehrini bera oladigan tizim yaratishimiz kerak.
Tuman va shahar hokimlari hamda sektor rahbarlari bolalarni homiylik, vasiylik va oila patronatiga berish ishlariga umuman e’tiborsiz”, — deydi Prezident.
Shavkat Mirziyoyev endi bu sohada yangi tizim joriy qilinishini ma’lum qildi.
“Birinchidan, 16 ta mehribonlik uyi va 4 ta bolalar shaharchasi Xalq ta’limi vazirligi tizimidan chiqarilib, Milliy gvardiyaga o‘tkaziladi.
Buning uchun Milliy gvardiyada alohida qo‘mondon o‘rinbosari lavozimi joriy etilib, boshqarma tashkil etiladi.
Milliy gvardiya qo‘mondoni ikki hafta muddatda har bir mehribonlik uyi va bolalar shaharchasiga shaxsan o‘zi borib, ularga Milliy gvardiyaning hududiy boshqarma boshliqlari, har bir guruhga malakali ofitser va psixologlarini biriktiradi, logoped va defektologlarni ishga oladi. Ikki oy muddatda biriktirilgan Milliy gvardiya xodimlarini bolalar bilan ishlashga o‘qitadi.
Shuningdek, mehribonlik uylaridagi bolalarga tarbiya berish, ularni fan, IT, xorijiy tillar, kasb-hunar va tadbirkorlikka o‘qitish, sport bilan shug‘ullanishlarini tashkil etish bo‘yicha mutlaqo yangi metodikalarni ishlab chiqadi”, – deydi Shavkat Mirziyoyev.
Izoh (0)