Buxoro shahridagi “Dilkusho” tennis markazida 2021-yilning 26—27-iyul kunlari Prezident maktabiga kirish imtihoni bo‘lib o‘tdi, deya xabar bermoqda “Daryo” muxbiri.

Foto: “Daryo”

Ta’kidlanishicha, Vazirlar Mahkamasi huzuridagi Prezident, ijod va ixtisoslashtirilgan maktablarni rivojlantirish agentligi tasarrufidagi Prezident maktabida o‘qish uchun Buxorodan 5767 nafar o‘quvchi hujjat topshirgan. Shaffoflikni ta’minlash maqsadida test jarayonlari onlayn translyatsiya qilingan. Shuningdek, 45 dona videokamera o‘rnatilib, jarayonlar to‘liq nazoratga olingan. 144 nafar professor o‘qituvchi guruh nazoratchilari sifatida qatnashgan.

Foto: “Daryo”

“Ikki kun davom etgan test sinovlarida pandemiya tartib-qoidalariga qat’iy amal qilindi. Prezident maktabida o‘qish uchun hujjat topshirgan 5767 nafar talabgordan 5621 nafari test sinovlarida ishtirok etdi. Har birining salomatligi xavfsizligi ta’minlandi. Ikki bosqichli test jarayonlarining birinchi bosqichida bir paytning o‘zida 1440 nafar o‘quvchi  ishtirokini ta’minlash imkoniyati yaratildi. Yana shuni aytish muhimki, test jarayonlarini adolatli va shaffof o‘tkazish uchun barcha qulayliklar shaylandi. Shuningdek, har bir talabgorga test sinovlarida ishtirok etishi tushuntirildi. Shunga qaramay, 146 nafar talabgor test sinovlariga kelmadi. 1 nafar o‘quvchi esa belgilangan tartib-qoidalarni buzgani uchun jarayondan chetlatildi”, — deydi DTM Buxoro viloyati bo‘limi bosh mutaxassisi Izzat Rahmonov.

Foto: “Daryo”

Prezident maktabiga qabul uchun test sinovlarining ikkinchi bosqichi 2021-yilning 20-avgustidan 25-avgustiga qadar o‘tkazilishi rejalashtirilgan.

Foto: “Daryo”

Eslatib o‘tamiz, avvalroq Farg‘onada maktab imtihonlari quyosh tig‘i ostida o‘tkazilayotgani tanqid ostiga olingandi. “Gazeta.uz”ga bu haqda izoh bergan bola huquqlari bo‘yicha vakil Aliya Yunusova imtihonlarni ushbu kunlarda o‘tkazish bosh vazir Abdulla Aripov boshchiligida aprel oyida o‘tkazilgan yig‘ilish bayonnomasida ko‘zda tutilganini qayd etgan. Bolalar ombudsmani imtihonlarni qabul qilib oluvchi buyuk britaniyalik mutaxassislarning O‘zbekistonga kelgani sababli kirish imtihonlari boshqa kunga ko‘chirilmaganini ham qo‘shimcha qilgan. Uning so‘zlariga ko‘ra, uzoq hududlardan kelgan bolalarning ota-onalari ham kirish imtihonlari sanalarining o‘zgarishiga qarshi bo‘lgan.