Namangan viloyati Yangiqo‘rg‘on tumanida avtomobillarni yuvish shoxobchasida o‘g‘rilik sodir etgan shaxs aniqlandi, deb xabar beradi viloyat IIB axborot xizmati.

Ma’lum qilinishicha, Yangiqo‘rg‘on tumanida yashovchi 23 yoshli fuqaro ariza bilan murojaat qilib, shu kunga o‘tar kechasi mahallasi hududida joylashgan avtomashinalarni yuvish shoxobchasida o‘g‘rilik sodir etilganini bildirgan.

Noma’lum shaxs, eshiklari ochiq qolganidan foydalanib, shoxobchadan 700 dollarlik avtomashina yuvish uchun mo‘ljallangan apparatini (karcher) va narxi 150 dollarlik ko‘pik sepish apparatini o‘g‘irlab ketgan.

Yangiqo‘rg‘on tuman IIB JQB boshlig‘i tomonidan olib borilgan tezkor-qidiruv va surishtiruv harakatlari natijasida, ushbu jinoyatni Yangiqo‘rg‘on tumanida yashovchi 1994-yilda tug‘ilgan fuqaro sodir etgani aniqlangan.

Ushbu holat bo‘yicha Yangiqo‘rg‘on tuman IIB huzuridagi Tergov bo‘limi tomonidan 17-iyul kuni Jinoyat kodeksining 169-moddasi (o‘g‘rilik) 1-qismi bilan jinoyat ishi qo‘zg‘atilgan.

Avvalroq Farg‘onada “moyka” xodimi Jizzaxdagi sevgan qizini ko‘rgani borish uchun o‘zganing Lacetti’sini minib qochgani to‘g‘risida xabar berilgandi.