Farg‘onada oilaviy janjal tufayli o‘zini poyezd ostiga tashlamoqchi bo‘lgan ayol qutqarib qolindi

Farg‘ona viloyati Buvayda tumanida o‘zini poyezd ostiga tashlamoqchi bo‘lgan ayol Transportda xavfsizlikni ta’minlash boshqarmasi PPX xodimi tomonidan ushlab qolindi. Bu haqda boshqarma matbuot xizmati xabar berdi.

Ma’lum qilinishicha, 11-iyul kuni soat 22:30 larda Farg‘ona viloyati IIB Transportda XTBga Qo‘qon—Buvayda temiryo‘l bekatlari oralig‘ining 22-kilometrida Jilva qishlog‘ida yashovchi O‘.Z. ismli fuqaro o‘zini poyezd ostiga tashlamoqchi bo‘lgan vaqtida TXTB PPX xodimi uni ushlab qolgani to‘g‘risida xabar kelib tushgan.

Olib borilgan surishtiruv ishlari natijasida fuqaro O‘.Z. haqiqatan ham oilaviy janjal tufayli o‘z joniga qasd qilmoqchi bo‘lgani aniqlangan.

Shundan so‘ng ushbu fuqaro bilan ota-onasi, mahalla raisi va mahalla faollari ishtirokida profilaktik suhbat o‘tkazilib, tushuntirish ishlari olib borilgan. “Jilva” mahalla fuqarolar yig‘ini raisining xotin-qizlar masalalari bo‘yicha o‘rinbosari murabbiy etib biriktirilgan.

Avvalroq Toshkentda eri bilan janjallashgan ayol elektr uzatish ustuniga chiqib, joniga qasd qilmoqchi bo‘lgani, Angren shahrida IIB xodimi o‘z joniga qasd qilgani, Farg‘onada eri bilan janjallashib qolgan 22 yoshli ayol o‘zini Katta Farg‘ona kanaliga tashlab, cho‘kib ketgani to‘g‘risida xabar berilgandi.