Qirg‘izistonning O‘zbekiston bilan chegaradosh hududlarida kutilayotgan mahalliy yomg‘irlar hisobiga 15—16-iyul kunlari Andijon, Namangan va Farg‘ona viloyatlarining tog‘ oldi va tog‘li hududlarida sel kelishi xavfi mavjud, deb xabar bermoqda “O‘zgidromet”.
Eslatib o‘tamiz, 13-iyul kuni Qirg‘iziston hududida kuchli yomg‘ir yog‘ishi oqibatida Namangan viloyatining Kosonsoy tumaniga sel kelgandi. Hodisa oqibatida 8 kishi halok bo‘ldi, 6 kishi tan jarohati olgan.
“O‘zgidromet” mazkur holat yuzasidan ma’lumot berdi.
Ma’lum qilinishicha, 13-iyul kuni Qirg‘izistonning shimoli-g‘arbiy qismi va Qozog‘iston janubidan atmosfera sovuq fronti o‘tdi. Kunning ikkinchi yarmida front o‘tishi ortidan Farg‘ona vodiysi tog‘ havzalarida kuchli yomg‘irli to‘p-to‘p bulutlar rivojlandi.
Qirg‘izistonning Jalolobod viloyati Oqsuv va Olabuqa tumanlarida mahalliy vaqt bilan 12:35 va 13:25 oralig‘ida kuchli jala yomg‘irlar yog‘ib o‘tgan. Kuchli jala yomg‘irlar Jalolobod viloyati Oqsuv tumani va Namangan viloyati Kosonsoy tumanidan oqib o‘tuvchi Kosonsoy soyida sel oqimini hosil qilgan.
Namangan viloyati Kosonsoy tumani ayrim hududlarida qisqa muddatli jala yomg‘irlari va do‘l hodisasi kuzatilgan. Qo‘shimcha qilinishicha, o‘rtacha hisobda do‘l diametri 1 santimetrni tashkil etgan.
“Kosonsoy tumani tog‘ oldi hudud hisoblanib, geografik joylashganligiga ko‘ra, sel toshqinlari hosil bo‘lishiga moyil hudud sanaladi. 13-iyul kuni qo‘shni Qirg‘iziston hududlarida kuzatilgan kuchli jala yomg‘irlar hisobiga shakllangan Kosonsoy soyidagi sel hodisalari oldinlari tumanning boshqa soylarida ham tez-tez takrorlangan”, — deyiladi xabarda.
Qayd etilishicha, 13-iyul kuni Kosonsoy soyidan maksimal 60 m³/s miqdordagi sel-suv toshqini o‘tgan. Bu Kosonsoy soyi uchun maksimal miqdor emas. Kosonsoy soyida sel hodisalari 1878-yildan boshlab ro‘yxatga olib kelinadi. Soyda sel hodisalari, asosan, aprel—iyul oylarida hosil bo‘ladi. Kosonsoy soyida tez-tez sel hodisalari kuzatilgan bo‘lib, 1964-yil 27−28-iyul kunlari — sekundiga 278 kubometr, 1988-yil 10-mayda — sekundiga 200 kubometr, 1992-yil 25-mayda — 250 kubometrni tashkil etgan.
“O‘zgidromet” aholini 14—17-iyul kunlari Qirg‘iziston bilan chegaradosh bo‘lgan hududlardagi dam olish maskanlariga bormaslikka chaqirgan.
Bundan avval Namangan viloyati IIB ham do‘l va sel sabab aholini qator tumanlardagi dam olish maskanlariga vaqtincha bormay turishga chaqirgandi.
Izoh (0)