Qashqadaryo viloyatining Yakkabog‘ tumanida faoliyat yurituvchi bloger — Elmurod Odilovning konstitutsiyaviy tuzumga tajovuzda gumon qilinishiga tuman hokimi o‘rinbosari Sarvar Avlayevning arizasi asos bo‘lgani ma’lum bo‘ldi. Bu haqda viloyat IIB axborot xizmati ma’lum qildi.
Ta’kidlanishicha, Yakkabog‘ tumani hokimining Mahalla va oilani qo‘llab-quvvatlash masalalari bo‘yicha o‘rinbosari Sarvar Avlayev 2021-yilning 1-iyul kuni tuman IIB boshlig‘iga ariza yozib, “Elmurod bloger” taxallusi bilan faoliyat yurituvchi fuqaro Elmurod Odilov hamda uning sherigi Sh.S.lar ijtimoiy tarmoqlarga Yakkabog‘ tumani hokimligi rahbariyatini obro‘sizlantirishga qaratilgan videomateriallar chiqarayotganini bildirib, ularga nisbatan qonuniy chora ko‘rishni so‘ragan.Mazkur holat Yakkabog‘ tuman IIB navbatchilik qismida belgilangan tartibda qayd etilgan.
“Mazkur holat bo‘yicha Yakkabog‘ tuman IIB huzuridagi tergov bo‘limi tergovchisi kapitan Dilshod Poyonov tomonidan tergovga qadar tekshiruv harakatlari olib borilmoqda. Shu sabab Yakkabog‘ tumanida istiqomat qiluvchi ‘Elmurod bloger’ taxallusi ostidagi fuqaro Elmurod Odilov hamda Yakkabog‘ tumanida yashovchi Sh.S. tuman IIB huzuridagi Tergov bo‘limiga taklif etilgan”, — deyiladi boshqarma rasmiy munosabatida.
Eslatib o‘tamiz, avvalroq Yakkabog‘ tumanida “Elmurod bloger” taxallusi ostida faoliyat yurituvchi bloger Elmurod Odilovdan tuman IIB tushuntirish xati olgani, blogerning ta’kidlashicha, bunga tuman hokimi Lutfiddin Abdullayev va uning o‘rinbosarlari tomonidan qilingan shikoyat sabab bo‘lgani xabar berilgandi. “Daryo” muxbiri bilan suhbatlashgan Elmurod Odilov “Menga qarshi 10 ga yaqin ayblov qo‘yilmoqda, ular orasida konstitutsiyaviy tuzumga tajovuz qilish kabi jiddiy ayblovlar ham bor. Tergovchi ikki oy davomida meni chaqirib, tergov qilishini aytdi”, degandi.
Izoh (0)