Farg‘ona viloyatining Rishton tumanida otasiga aliment to‘lashdan bo‘yin tovlagan shaxsga nisbatan jinoyat ishi qo‘zg‘atildi. Bu haqda “Daryo”ga MIB viloyat boshqarmasi axborot xizmati ma’lum qildi.
Qayd etilishicha, majburiy ijro byurosi Rishton tuman bo‘limi ish yurituviga fuqarolik ishlari bo‘yicha Rishton tumanlararo sudining buyrug‘iga asosan qarzdor F.B.dan undiruvchi O.B. foydasiga aliment undirish haqidagi ijro hujjati kelib tushgan.
Mazkur ijro hujjati o‘g‘ildan otaga aliment undirish haqida bo‘lib, qarzdor F.B. sobiq turmush o‘rtog‘i bilan ajrashgani uchun uning ikki nafar voyaga yetmagan farzandini otasi o‘z qaramog‘iga olgan. Biroq bolalarning otasi — boboning o‘g‘li bolalarining moddiy ta’minotiga umuman e’tibor qaratmagan.
2020-yil yanvar—sentabr oylari uchun yuzaga kelgan 8 million 140 ming 468 so‘m aliment pulini farzandlari ta’minoti uchun o‘z otasiga to‘lab berishdan ochiqdan ochiq bo‘yin tovlagan o‘g‘il 2020-yil 6-oktabrda Rishton tuman ma’muriy sudi qaroriga asosan Ma’muriy javobgarlik to‘g‘risidagi kodeksning tegishli moddalarida ko‘rsatilgan huquqbuzarlikni sodir etgan deb topilib, unga 15 sutka qamoq jazosi tayinlangan.
Biroq qarzdor 2020-yil oktabr oyidan 2021-yilning iyul oyiga qadar ham hisoblangan 8 million 728 ming so‘m, umumiy hisobda 16 million 868 ming so‘m aliment pulini otasi O.B.ga to‘lamasdan kelgan va u bilan o‘tkazilgan suhbat jarayonida alimentni to‘lamasligini ma’lum qilgan.
Shundan so‘ng 2021-yilning 29-iyun kuni qarzdor F.B.ga nisbatan Jinoyat kodeksning 122-moddasi 1-qismi (voyaga yetmagan yoki mehnatga layoqatsiz shaxslarni moddiy ta’minlashdan bo‘yin tovlash) bilan jinoyat ishi qo‘zg‘atilib, hozirda surishtiruv harakatlari olib borilmoqda.
