Jons Hopkins universiteti ma’lumotlariga ko‘ra, dunyoda koronavirusga chalinganlar soni 184 186 274 kishini tashkil qilmoqda, shularning 3 985 486 nafari kasallikdan vafot etgan. Kasallanish holatlari soni bo‘yicha AQSh (33,7 million), Hindiston (30,6 million), Braziliya (18,7 million), Fransiya (5,8 million) va Rossiya (5,5 million) yetakchilik qilmoqda.

Foto: Reuters

Rossiyada so‘nggi bir kecha-kunduzda 737 kishi COVID-19 tufayli vafot etdi. Bu koronavirusdan kunlik o‘limlar soni bo‘yicha rekord ko‘rsatkich, chunki pandemiya boshidan buyon mamlakatda bir kunda 700 va undan ortiq o‘lim qayd etilmagan edi.

Avvalgi rekord 3-iyulda o‘rnatilgan, o‘shanda 697 kishi kasallik qurboni bo‘lgan.

So‘nggi 24 soat ichida COVID-19’dan eng ko‘p o‘lim odatdagidek Moskva va Sankt-Peterburgga to‘g‘ri keldi. O‘tgan kun davomida Moskvada 114 bemor vafot etgan bo‘lsa, Sankt-Peterburgda 99 kishi kasallik qurboni bo‘ldi. Shuningdek, rekord darajada o‘sishga viloyatlardagi o‘limlar soni ham hissa qo‘shgan, xususan, Irkutsk viloyatida (33 kishi), Nijegorodda (26), Buryatiyada (24), Krasnodar o‘lkasida (23), Penza viloyati (22) va Moskva viloyatida eng ko‘p o‘limlar qayd etilgan.

Rossiya federal operativ shtabi ma’lumotlariga ko‘ra, mamlakatda pandemiya boshlanganidan beri COVID-19 qurbonlarining umumiy soni 139 316 kishini tashkil qilmoqda.

O‘tgan kun davomida Rossiyada koronavirus yuqtirish bo‘yicha 23 378 ta yangi holat aniqlanib, infeksiya yuqtirganlarning umumiy soni 5,658 milliondan oshgan.

Meksikaning Laboratorios de Biologicos y Reactivos de Mexico (BIRMEX) farmatsevtika kompaniyasi tomonidan Rossiyaning “Sputnik V” koronavirusga qarshi vaksinasi ishlab chiqarildi. Ushbu preparatlardan mahalliy aholini emlash uchun foydalaniladi. Vaksinalar Rossiya to‘g‘ridan to‘g‘ri investitsiya fondi (RTIF) bilan hamkorlikda ishlab chiqarilmoqda.

“‘Sputnik V’ bir necha oydan buyon Meksikada muvaffaqiyatli qo‘llanib kelinmoqda hamda xavfsizlik va samaradorlikning ajoyib ko‘rsatkichlarini namoyish etmoqda”, — dedi RTIF bosh direktori Kirill Dmitriyev.

“Sputnik V” vaksinasi 2021-yilning 3-fevralida qo‘shimcha klinik sinovlarsiz tezlashtirilgan protsedura doirasida Meksikada ro‘yxatdan o‘tkazilgan. Meksika “Sputnik V”ni ro‘yxatdan o‘tkazgan va ishlab chiqarishni boshlagan Shimoliy Amerikadagi birinchi davlat bo‘ldi.

Hindistonda ham “Sputnik V” vaksinasining sinov partiyasi ishlab chiqarildi.

“RTIF va Hindistonning yetakchi farmatsevtika kompaniyalaridan biri bo‘lgan Morepen Laboratories kompaniyaning Ximachal-Pradesh shtatida joylashgan zavodida ‘Sputnik V’ koronavirusga qarshi vaksinasining sinov partiyasi ishlab chiqarilganini e’lon qiladi”, — deyiladi RTIF matbuot xizmati xabarida.

Ishlab chiqarilgan vaksinalar sifat nazorati uchun Gamaleya markaziga yuboriladi.

Ta’kidlanishicha, RTIF va Morepen Laboratories kompaniyasi 2021-yilning iyun oyida hamkorlik to‘g‘risidagi bitimni imzolagan va “hozirda texnologiyalarni uzatish jarayonini faol amalga oshirmoqda”.

RTIF, shuningdek, Hindistonning boshqa eng yirik farmatsevtika ishlab chiqaruvchilari: Gland Pharma, Hetero Biopharma, Panacea Biotec, Stelis Biopharma, Virchow Biotech bilan ham shartnomalar imzolagan. Ushbu hamkorlik Hindistonga har yili o‘z hududida 850 million dozadan ortiq “Sputnik V” vaksinasini ishlab chiqarishga imkon beradi, deyiladi matbuot xizmatida.

Shuningdek:

  • Indoneziyada 6-iyuldan mamlakatga kelgan xorijlik sayyohlardan koronavirusga qarshi to‘liq emlanganlik to‘g‘risida sertifikat talab qilish boshlandi. Bundan tashqari, mamlakatga kirish uchun ikkita PZR-testidan va sakkiz kunlik karantindan o‘tish kerak. Rossiyaning “Sputnik V” vaksinasi Indoneziya hukumati tomonidan tasdiqlanmagani sababli ushbu vaksina sertifikati mamlakatga kirish huquqini bermaydi. Ta’kidlanishicha, koronavirusga topshirgan testi natijalari ijobiy chiqqan chet elliklarning barchasi o‘z mablag‘lari hisobidan kasalxonaga yoki kovid-mehmonxonaga ikki haftaga joylashtiriladi
  • Fransiyaning Sanofi kompaniyasi koronavirusga qarshi ishlab chiqqan vaksinasi klinik sinovlarining uchinchi bosqichini boshladi. Dekabr oyida Fransiya COVID-19’ga qarshi o‘z vaksinasini qo‘llay boshlashi mumkin. Pfizer-BioNTech, AstraZeneca, Moderna va Janssen vaksinasidan farqli o‘laroq, fransuz vaksinasida mRNK texnologiyasi qo‘llanilmaydi. Preparat grippga qarshi zamonaviy vaksinalar singari rekombinant oqsilga asoslangan bo‘ladi. Undagi maxsus modda — advuyantom yordamida immunitetning javobi faol va uzoqroq davom etadi. Shuningdek, Fransiya vaksinasining afzalliklari orasida uni ishlab chiqarish arzon bo‘lishi va preparatni saqlash tartibi soddaroq bo‘lishi kuzda tutilgan. Vaksinaning arzonligi dunyodagi kam rivojlangan davlatlarga yordam berishi mumkin.
  • Kembrij gersoginyasi Keyt koronavirus bilan kasallangani tasdiqlangan odam bilan aloqada bo‘lganidan so‘ng o‘zini o‘n kunlik izolyatsiyaga oldi. 6-iyul kuni u turmush o‘rtog‘i, shahzoda Uilyam bilan Milliy sog‘liqni saqlash xizmatining 73 yilligiga bag‘ishlangan tadbirlarda ishtirok etishi kerak edi. Kensington saroyi gersoginyada kasallik alomatlari yo‘qligini ta’kidlamoqda, ammo Keyt qoidalarga sodiq qoladi. U 2-iyul kuni kechqurun o‘zini izolyatsiyaga olgan. Avvalroq Keyt va Uilyam koronavirusga qarshi emlangan edi.