Turkmaniston prezidenti Gurbanguli Berdimuhamedov 1-iyul kuni Xavfsizlik kengashining kengaytirilgan yig‘ilishini o‘tkazgan. Bu haqda “Xronika Turkmenistana” xabar qildi.
Yig‘ilishning ochiq qismida Turkmaniston prezidenti mamlakatda jinoyatchilikning o‘sib ketgani va kuchishlatar tizim xodimlarining malakasi borasida xavotirda ekanligini bildirdi.
Bundan tashqari, “Xronika Turkmenistana” nashrining o‘z manbalariga tayanib yozishicha, yig‘ilishning yopiq qismida OAV vakillari ishtirok etmagan va unda Berdimuhamedov hamda harbiy idoralarning rahbarlari qo‘shni Afg‘onistondagi vaziyatni muhokama qilib, ikki mamlakat chegaralari hududida harbiy qo‘shin sonini oshirish borasida suhbatlashgan.
Yig‘ilishda Mari hamda Lebob viloyatlarida chegaradan 130 kilometr uzoqlikda raketa qurollarini joylashtirish, Mari-2 harbiy aerodromiga qo‘shimcha ravishda harbiy vertolyotlar va shturm uchun texnika yuborish haqida topshiriqlar berilgan. Aerodromda aviatsiya guruhlarining boshqaruv punkti joylashgan.
Shuningdek, armiyada yuk mashinalar uchun malakali haydovchilar, tanklar va bronetransport uchun xodimlar yetishmasligi qayd etilgan. Zarurat bo‘lganda harbiy texnikani boshqarishga fuqarolik tuzilmalaridan 60 yoshgacha bo‘lgan yuk mashinasi, benzovoz, treyler va sanitar avtomobillarining tajribali haydovchilari jalb qilinishi ta’kidlangan.
Noma’lum sabablarga ko‘ra Eron bilan chegara hududidagi Garrigala, Serdar (sobiq Qizilravot), Baxarden va Kaka tumanlaridagi harbiy qismlarga ham qo‘shimcha bo‘linmalar yuborish haqida topshiriq berilgan.
Shu bilan birga yig‘ilishda chegarani qo‘riqlash uchun xorijdan yollanma qo‘shin jalb etish masalasi ham muhokama qilingan.
“Tolibon” harakati Afg‘onistondan AQSh harbiylari va ularning ittifoqchilari chiqib keta boshlaganidan keyin faollashgan. Avval “Tolibon” vakillarining Afg‘onistonda Turkmaniston bilan chegara hududidagi Andxoy viloyatini egallagani xabar qilingan edi.
5-iyul kuni Emomali Rahmon tojik-afg‘on chegarasini mustahkamlash uchun armiya rezervidagi 20 ming nafar harbiy xizmatchini safarbar etgani, Rossiya prezidenti Vladimir Putin Tojikistonga Afg‘oniston bilan chegaradagi vaziyatning keskinlashuvi munosabati bilan yordam berishni va’da qilgani haqida xabarlar berilgan.Shuningdek, “Tolibon” bilan to‘qnashuvdan so‘ng 1000 dan ortiq afg‘onistonlik harbiylar Tojikistonga chekingani, Shavkat Mirziyoyev va Emomali Rahmon Afg‘onistondagi keskinlikning kuchayishi bilan bog‘liq vaziyatni muhokama qilgan. 3-iyul kuni “Tolibon” bilan to‘qnashuvdan keyin 300 dan ortiq afg‘onistonlik harbiylar Tojikistonga chekingan, undan oldin “Tolibon” Afg‘onistonning Tojikiston bilan chegaradagi hududini egallab olgan hamda tojik—afg‘on chegarasidagi vaziyat keskin deb baholangan. Keyinchalik Afg‘onistonda hukumat qo‘shinlari “Tolibon” jangarilarini mamlakat shimolidagi bir nechta tumanlardan siqib chiqargan. AQSh davlat kotibi Entoni Blinken Afg‘onistondan AQSh qo‘shinlari olib chiqib ketilgach, mamlakatda hokimiyat tepasiga “Tolibon” harakati vakillari kelishi mumkinligini istisno qilmagan.
Afg‘onistondan NATO qo‘shinlarini olib chiqish 29-aprelda boshlangan, AQSh va “Tolibon” o‘rtasida tuzilgan kelishuvga binoan jarayon kuzda yakunlanishi kerak. Bugunga qadar Germaniya va Italiya Afg‘onistondan o‘z qo‘shinlarini olib chiqishni yakunlagan.
Izoh (0)