BMT Taraqqiyot dasturi va Global ekologiya jamg‘armasi (GEJ) ko‘magida hamda “Atmosferaga zararli moddalarni kam chiqaruvchi avtotransport vositalariga investitsiyalar jalb qilishni jadallashtirish” dasturi doirasida Toshkent shahri uchun elektrobuslar sotib olinadi. Bu haqda Transport vazirligi matbuot xizmati xabar berdi.
Ma’lum qilinishicha, 30-iyun kuni Toshkentda loyihani baholash qo‘mitasining manfaatdor vazirlik va idoralar mas’ul xodimlari ishtirokida yig‘ilishi bo‘lib o‘tgan.
Olti yilga mo‘ljallangan ushbu loyiha Toshkent shahri misolida shahar jamoat transportida elektrotransportdan jadal ravishda foydalanishni joriy etish yo‘li bilan atrof-muhit sifatini yaxshilashga yo‘naltirilgan bo‘lib, ushbu tajriba O‘zbekistonning boshqa shaharlarida ham joriy etilishi mumkin.
Loyiha doirasida Toshkent shahri jamoat transporti uchun elektrobuslarni xarid qilish hamda pilot loyiha tariqasida shaharda “yashil transport yo‘lagini” joriy etish rejalashtirilgan. Loyihaga donorlar BMT Taraqqiyot dasturi va Global ekologiya jamg‘armasi tomonidan 3,9 million dollar mablag‘ ajratilishi ko‘zda tutilgan.
Loyiha BMT Taraqqiyot dasturining O‘zbekistondagi vakolatxonasi tomonidan Transport vazirligi, Toshkent shahar hokimligi, Ekologiya va atrof-muhitni muhofaza qilish davlat qo‘mitasi, “Toshshahartransxizmat” AJ hamda boshqa manfaatdor vazirlik va idoralar bilan hamkorlikda amalga oshiriladi.
Eslatib o‘tamiz, Toshkent shahar hokimi Jahongir Ortiqxo‘jayev va “Belkommunmash” rahbari Vladimir Korol o‘rtasida 2018-yil sentabrida bo‘lib o‘tgan muzokaralar yakuniga ko‘ra, Belarus elektrobuslaridan birini Toshkentda sinab ko‘rish bo‘yicha kelishuvga erishilgan edi. 450 ming dollarga xarid qilingan birinchi elektrobus Toshkentda 2019-yilning 13-sentabridan harakatlanishni boshlagandi. 2020-yilning mart oyidan boshlab esa Toshkentning 52-avtobus yo‘nalishi (Beshyog‘och—Yunusobod) bo‘ylab Xitoyning Yutong elektrobusi sinov tariqasida qatnay boshlagandi.
Avvalroq Toshkentga uch yil ichida 300 ta yangi elektrobus olib kelinishi mumkinligi haqida xabar berilgandi.
Izoh (0)