БМТ Тараққиёт дастури ва Глобал экология жамғармаси (ГЕЖ) кўмагида ҳамда «Атмосферага зарарли моддаларни кам чиқарувчи автотранспорт воситаларига инвестициялар жалб қилишни жадаллаштириш» дастури доирасида Тошкент шаҳри учун электробуслар сотиб олинади. Бу ҳақда Транспорт вазирлиги матбуот хизмати хабар берди.
Маълум қилинишича, 30 июнь куни Тошкентда лойиҳани баҳолаш қўмитасининг манфаатдор вазирлик ва идоралар масъул ходимлари иштирокида йиғилиши бўлиб ўтган.
Олти йилга мўлжалланган ушбу лойиҳа Тошкент шаҳри мисолида шаҳар жамоат транспортида электротранспортдан жадал равишда фойдаланишни жорий этиш йўли билан атроф-муҳит сифатини яхшилашга йўналтирилган бўлиб, ушбу тажриба Ўзбекистоннинг бошқа шаҳарларида ҳам жорий этилиши мумкин.
Лойиҳа доирасида Тошкент шаҳри жамоат транспорти учун электробусларни харид қилиш ҳамда пилот лойиҳа тариқасида шаҳарда «яшил транспорт йўлагини» жорий этиш режалаштирилган. Лойиҳага донорлар БМТ Тараққиёт дастури ва Глобал экология жамғармаси томонидан 3,9 миллион доллар маблағ ажратилиши кўзда тутилган.
Лойиҳа БМТ Тараққиёт дастурининг Ўзбекистондаги ваколатхонаси томонидан Транспорт вазирлиги, Тошкент шаҳар ҳокимлиги, Экология ва атроф-муҳитни муҳофаза қилиш давлат қўмитаси, «Тошшаҳартрансхизмат» АЖ ҳамда бошқа манфаатдор вазирлик ва идоралар билан ҳамкорликда амалга оширилади.
Эслатиб ўтамиз, Тошкент шаҳар ҳокими Жаҳонгир Ортиқхўжаев ва «Белкоммунмаш» раҳбари Владимир Корол ўртасида 2018 йил сентябрида бўлиб ўтган музокаралар якунига кўра, Беларусь электробусларидан бирини Тошкентда синаб кўриш бўйича келишувга эришилган эди. 450 минг долларга харид қилинган биринчи электробус Тошкентда 2019 йилнинг 13 сентябридан ҳаракатланишни бошлаганди. 2020 йилнинг март ойидан бошлаб эса Тошкентнинг 52-автобус йўналиши (Бешёғоч—Юнусобод) бўйлаб Хитойнинг Yutong электробуси синов тариқасида қатнай бошлаганди.
Аввалроқ Тошкентга уч йил ичида 300 та янги электробус олиб келиниши мумкинлиги ҳақида хабар берилганди.
Изоҳ (0)