Ijtimoiy tarmoqlarda Myunxen shahridagi avtomobil yo‘lida sodir bo‘lgan yo‘l-transport hodisasining surati tarqaldi. Kadrda Alonso Edition nomi bilan tanilgan qizil Ferrari 599 GTB 60F1 tasvirlangan. Noyob superkar haydovchisi ho‘l yo‘lda boshqaruvni eplay olmay, avariyaga uchragan, deb xabar beradi Motor.

Foto: Instagram / Muc.collector

Ferrari 599 GTB 60F1 modeli Italiya markasining “Formula-1”dagi 60 yilligi munosabati bilan ishlab chiqarilgan. Poyga mashinasida birinchi bor Xose Froylan Gonsales Britaniyaning Silverstounida o‘tkazilgan musobaqada chempion bo‘lgan. Oradan 60 yil o‘tgach, Fernando Alonso Ferrari rulida Buyuk Britaniyadagi Gran-pri g‘olibiga aylangan. Ispaniyalik avtopoygachining g‘alabasi munosabati bilan kompaniya Alonso Edition nomli 40 nusxa noyob superkarni yaratgan.

Ferrari 599 GTB 60F1 o‘sha vaqtdagi “Formula-1”ning ikki xil rangdagi eksteryeri bilan farqlangan. Superkarlar markaning Scuderia sport bo‘linmasining yorlig‘iga, orqa spoyler va olmos bilan ishlov berilgan g‘ildirak diskalariga ega bo‘lgan. Muhandislar mashina interyerini alkantara bilan qoplagan. Mashinaning har biriga shaxsan Xose Froylan Gonsales va Fernando Alonsoning o‘zi imzo chekkan.

Mazkur superkar nima sababdan avariyaga uchragani noma’lum. Suratlarga ko‘ra, Ferrari haydovchisi ho‘l yo‘lda boshqaruvni eplay olmay, yo‘l chetidagi to‘siqqa urilgan. Zarba oqibatida avtomobilning old kuzovi, shuningdek, yo‘lovchi tomoniga jiddiy shikast yetgan. Mashina qayta tiklanishga yaroqsiz holga kelib qolgan, shu sababli dunyoda cheklangan miqdordagi Ferrari’lar soni yana bittaga kamaygan.

Avvalroq germaniyalik erkak bir yil kutgan Ferrari’sini xarid qilganidan olti soat o‘tib avariyaga uchragani to‘g‘risida xabar berilgandi.