Buxoro viloyatida 2004-yili ishdan bo‘shatilgan soxta IIB xodimi aniqlandi, deya xabar berdi “Daryo” muxbiri.
Qayd etilishicha, o‘z avtomashinasida yo‘l harakati qoidasini buzib, YPX xodimi tomonidan to‘xtatilgan O‘.S. o‘zini ichki ishlar organlarida uzoq yillar xizmat qilib, so‘ngra nafaqaga chiqqan mayor sifatida tanishtiradi va yo‘l patrul xizmati inspektoriga 2014-yil 23-mayda O‘zbekiston IIV MIB rahbari tomonidan berilgan, 3817 guvohnomani ko‘rsatadi.
YPX xodimi ushbu guvohnomaning haqiqiyligiga shubha qilib, hujjatni arxivdan tekshirish uchun viloyat Ichki ishlar boshqarmasiga bildirgan. Holat yuzasidan o‘tkazilgan tezkor-surishtiruv harakatlari davomida bunday guvohnoma yo‘qligi ma’lum bo‘lgan.
O‘rganishlar davomida O‘.S.ning 2004-yildan buyon “Agrobank” Qorako‘l tumani filialida yurist-konsult vazifasida ishlab kelayotgani aniqlangan.
Shuningdek, surishtiruv harakatlari davomida O‘.S.ning haqiqatan ham 1998–2004-yillar mobaynida viloyat ichki ishlar organlarining turli vazifalarida xizmat qilgani va 2004-yilda xizmatga noloyiq xatti-harakatlari sabab ishdan bo‘shatilgani ham oydinlashgan.
Hozirda fuqaro O‘.S.ga nisbatan tergovga qadar tekshiruv harakatlari olib borilmoqda.
Bundan avval Toshkentda MIB xodimi ikki yilda 596 mln so‘mni o‘zlashtirib yuborgani ma’lum bo‘lgani, Buxoroda soxta Milliy gvardiya xodimi qo‘lga olingani hamda Buxoroda marhum O‘ktam Barnoyevning soxta jiyani 5 yil 6 oy muddatga qamalgani haqida xabar berilgandi.
Izoh (0)