Dunyoning eng boy odamlaridan biri Bill Geyts so‘nggi o‘n yil ichida AQShning 18 shtatida 110 ming gektarga yaqin qishloq xo‘jaligi yerlarini sotib olgan. NBC News va The Land Report tomonidan o‘tkazilgan surishtiruv natijalariga ko‘ra, shu tariqa milliarder mamlakatdagi eng yirik xususiy mulkdorga aylangan.
Nashrlar ma’lum qilishicha, Geytsning fermerlari Luiziana shtatidagi qariyb 30 ming gektar maydonda makkajo‘xori, paxta va sholi, Nebraska shtatidagi sakkiz ming gektar yerda esa soya yetishtiradi. Vashingtonda milliarder besh ming gektar qishloq xo‘jaligi yerlariga egalik qiladi. Ba’zi dalalarda McDonald’s uchun kartoshka yetishtiriladi.
Ma’lumki, Bill Geyts iqlim o‘zgarishiga qarshi kurashga muntazam ravishda sarmoya kiritadi hamda barqaror oziq-ovqat ishlab chiqarishni, masalan, go‘sht o‘rnini bosuvchi va o‘simliklarga asoslangan oziq-ovqat alternativlarini yaratish bo‘yicha startaplarni qo‘llab-quvvatlaydi. Biroq milliarder yer sotib olish uning ekologik faoliyati bilan bog‘liq emasligini aytdi: “Mening sarmoyaviy guruhim shunday qilishga qaror qilgan. Bu iqlim bilan bog‘liq emas”.
Nyu-Yorkdagi yangi fermerlarning Milliy koalitsiyasi direktori Xolli Rippon-Batler Geytsni shuncha gektar maydonlarni sotib olgani uchun tanqid qildi. Uning fikricha, bu yosh fermerlarning bozorga kirishiga to‘sqinlik qiladi: ular yer sotib olayotganda milliarder bilan raqobatlasha olmasdan, yerni ijaraga olishga majbur bo‘lmoqda.
Geyts, shuningdek, “bilvosita pudratchilari”dan foydalanishda ayblanmoqda. Jurnalistlarning fikriga ko‘ra, uning Cascade Investments kompaniyasi bu yerlarni to‘g‘ridan to‘g‘ri emas, balki kamida 22 ta mahalliy firma tarmog‘i orqali qo‘lga kiritgan. Ular Geytsning kompaniyasi bilan hamkorlik qilishlarini rasman e’lon qilmagan, ammo ularning yuridik manzili, ishchilar ro‘yxati va ba’zan elektron pochta xabarlari bir xil.
Izoh (0)