Emomali Rahmon: Shavkat Mirziyoyev — yaxshi qo‘shnichilik munosabatlarining tashabbuskori va arxitektori

Shavkat Mirziyoyev Tojikistonga rasmiy tashrifi doirasida 11-iyun kuni Dushanbedan Xo‘jandga kelganidan so‘ng ikki mamlakat yetakchilari qisqa uchrashuv o‘tkazib, birgalikda Xo‘jand yaqinidagi “Arbob” madaniyat saroyiga yo‘l olgandi. Prezident matbuot xizmatining ma’lum qilishicha, bu yerda So‘g‘d viloyati jamoatchiligi vakillari, ziyolilar, nuroniylar bilan uchrashuv bo‘lib o‘tdi.

Emomali Rahmon Shavkat Mirziyoyevning siyosiy irodasi bilan ikki mamlakat o‘rtasida ishonch va do‘stlik muhiti yaratilganini ta’kidladi.

“Ilgari to‘planib qolgan muammolar shunday qisqa muddatda hal etilishini tasavvur qilib bo‘larmidi?! Bunga xalqaro tashkilotlar ham ishonmagan edi. Bugun davlatlarimiz o‘rtasida hal bo‘lmagan masala qolmadi, o‘zaro ishonch paydo bo‘ldi. Bunday munosabatlarning tashabbuskori va arxitektori — hurmatli Shavkat Miromonovich Mirziyoyev”, — degan Emomali Rahmon.

Keyingi yillarda davlat chegaralarida 17 ta o‘tkazish punkti ochilgani, Tojikiston xalqi bundan minnatdor ekani qayd etildi.

Shavkat Mirziyoyev chuqur hurmatini bildirib, xalqlar o‘rtasidagi do‘stlikni qadrlash, madaniy-gumanitar aloqalarni rivojlantirish haqida nutq so‘zladi.

“So‘nggi yillarda O‘zbekiston bilan Tojikiston o‘rtasida qaror topgan yaxshi qo‘shnichilik va abadiy do‘stlik tufayli biz ulkan natijalarga erishmoqdamiz. Albatta, bunday yutuqlarga erishishda siz, azizlarning, ikki mamlakat jamoatchiligi va ziyolilarining beqiyos hissasi borligini biz yaxshi bilamiz va yuksak qadrlaymiz”, — degan u.

Uchrashuvda dunyo shiddat bilan o‘zgarayotgani, bizning mintaqada ham xavfsizlikka yangi tahdidlar yuzaga kelayotgani qayd etildi.

“Biz tinchlik va barqarorlik, do‘stlik va hamkorlik kabi buyuk ne’matlarni alohida qadrlashimiz va mustahkamlashimiz, yoshlarda milliy va umuminsoniy qadriyatlarga hurmat tuyg‘usini tarbiyalashimiz kerak. Sa’y-harakatlarimizni birlashtirsakkina, xalqlarimiz uchun tinchlik va xotirjamlikni, kelgusi avlodlarga farovon hayotni ta’minlashdek umumiy maqsadga erishishimiz mumkin. Ishonchim komilki, siz, ijodiy va ilmiy sohalarning hurmatli vakillari, o‘zingizning boy bilim va hayotiy tajribangiz, tashabbuskorlik va g‘ayratingiz bilan xalqlarimiz do‘stligini mustahkamlashga munosib hissa qo‘shasiz” — degan O‘zbekiston Prezidenti.

Xabarda aytilishicha, davlat rahbarlari  “Arbob” madaniyat saroyini ko‘zdan kechirdi. Ushbu majmua 1959-yilda barpo etilgan. U tojik xalqi uchun tarixiy ahamiyatga ega. O‘tgan asrning 90-yillari boshida bu yerda mamlakat mustaqilligiga doir muhim qarorlar qabul qilingan. Bu yerda 1992-yilda Emomali Rahmon davlat rahbari lavozimiga kirishgan.

Eslatib o‘tamiz, Shavkat Mirziyoyev Tojikiston prezidenti Emomali Rahmonning taklifiga binoan 10-iyun kuni rasmiy tashrif bilan Tojikistonga keldi. Tashrifning ilk kunida davlat rahbari Dushanbe xalqaro aeroportida tantanali kutib olindi, “Qasri Millat” qarorgohida uyushtirilgan tantanali marosimda qatnashdi. Shu yerning o‘zida ikki davlat rahbarlari avvaliga tor, so‘ng kengaytirilgan tarkibdagi uchrashuvlarda ishtirok etdi.

Bundan tashqari, Samarqand va Xatlon viloyatlarida qurilgan ijtimoiy obyektlarning ochilish marosimi o‘tkazildi.

Tadbirlar yakunida O‘zbekiston va Tojikiston o‘rtasida 35 ta hujjat imzolandi. Emomali Rahmon Shavkat Mirziyoyevni birinchi darajali “Zarrintoj” ordeni bilan mukofotladi.