Buxoroda o‘n ming dollar evaziga to‘rt nafar fuqaroni nomdor kompaniyaga ishga joylashtirishni va’da qilgan bir guruh shaxslar qo‘lga olindi. Bu haqda “Daryo”ga viloyat IIB axborot xizmati rahbari Shuhrat Jalolov xabar berdi.
Ta’kidlanishicha, holat viloyat Ichki ishlar boshqarmasi Jinoyat qidiruv boshqarmasi xodimlari tomonidan o‘tkazilgan tezkor tadbirda aniqlangan.
Vobkent tumanidagi “Kulonchi” mahallasida yashovchi 38 yoshli G‘.S. Toshkent shahrida yashovchi 56 yoshli jinoiy sherigi M.X. bilan hech qayerda ishlamay, daromad topish rejasini tuzgan. Puxta o‘ylangan rejalar asosida o‘zlariga tanish bo‘lgan Qoraqalpog‘iston Respublikasi, Qo‘ng‘irot tumanida yashovchi S.M.ning to‘rt nafar qarindoshini “Enter engineering” kompaniyasining “Uz GTL” tarmog‘idagi mansabdor tanishlari orqali ishga joylashtirib qo‘yishni va’da qilgan. S.M. dan har bir qarindoshi uchun 2500 dollardan, jami 10 000 dollar miqdoridagi pullarni pora tariqasida berishga undagan.
Oradan vaqt o‘tishiga qaramay, qarindoshlarining ishga joylashishi muammo bo‘layotgan S.M. avvaldan o‘ziga tanish bo‘lgan ikki shaxsning xatti-harakatlaridan shubhalangan hamda bu haqda viloyat IIBga murojaat qilishga majbur bo‘lgan. Zudlik bilan Jinoyat qidiruv boshqarmasi xodimlari tomonidan tezkor tadbir uyushtirilgan. G‘.S. hamda M.X. kelishilgan pullardan 90 million so‘mni Buxoro shahrining G‘ijduvon ko‘chasidan o‘tuvchi yo‘l yoqasida pora tariqasida olayotgan vaqtda qo‘lga olingan. Holat tegishli tartibda hujjatlashtirilgan.
Mazkur holat yuzasidan Buxoro shahar Ichki ishlar organlari faoliyatini muvofiqlashtirish boshqarmasi huzuridagi Tergov bo‘limi tomonidan G‘.S. va M.X.larga nisbatan Jinoyat kodeksining 168-moddasi 2-qismi “b” bandi (firibgarlik) va 28-modda (jinoyat ishtirokchilarining turlari), 211-moddasi 2-qismi “b” (pora berish) bandi bilan jinoyat ishi qo‘zg‘atilgan. Hozirda dastlabki tergov harakatlari olib borilmoqda.
