Abu-Dabi taraqqiyot jamg‘armasi (ADFD) va Turkmaniston hukumati o‘rtasida 10-iyun kuni qiymati 99,91 million dollar bo‘lgan ikkita bitim imzolandi. Bu haqda BAA ommaviy axborot vositalariga tayanib, “Interfaks” xabar berdi.
Foto: Business.com
Xabarga ko‘ra, bitimlardan biri Turkmanistonning Bolqon mintaqasidagi Jebel shahrida aeroport qurilishini moliyalashtirishni nazarda tutadi, ikkinchisi 10 MVt quvvatga ega gibrid elektr stansiyasini qurishni moliyalashtirishni ko‘zda tutadi.
Bitimlar ADFD bosh direktori Muhammad Sayf al-Suvaydiy va Turkmaniston Tashqi iqtisodiy aloqalar davlat banki raisi Rahimberdi Jeparov tomonidan BAAda o‘tkazilgan uchrashuv davomida imzolandi.
Uchrashuvda, shuningdek, BAA Energetika va infratuzilma vaziri Suhayl ibn Muhammad Faraj Faris al-Mazruiy hamda va Turkmaniston Oliy nazorat palatasi raisi, bosh vazir o‘rinbosari Serdar Berdimuhamedov va har ikki tomonning boshqa rasmiylari ishtirok etgan.
Jebel aeroporti loyihasi Bolqon mintaqasida havo transporti infratuzilmasini yaxshilash, Markaziy Osiyoda hududiy havo aloqasini kuchaytirish va transport xizmati sifatini oshirish orqali sarmoyalarni jalb qilishga qaratilgan. Loyiha doirasida soatiga 100 nafar yo‘lovchini o‘tkazish imkoniyatiga ega terminal quriladi.
Ta’kidlanishicha, loyiha tarkibiy qismlari loyihani rejalashtirish, dizaynlash, qurish va yetkazib berish, shuningdek aeroport xodimlarini o‘qitishdan iborat.
Turkmaniston OAVlari xabar berishicha, prezident Gurbanguli Berdimuhamedovning buyrug‘i bilan o‘zaro manfaatli sheriklikni rivojlantirish bo‘yicha muzokaralar o‘tkazish uchun Turkmaniston hukumat delegatsiyasi 9-iyun kuni BAAga jo‘nab ketgan edi.
Abu-Dabi va Dubay shaharlarida bo‘lib o‘tadigan uch kunlik muzokaralar davomida tomonlar Turkmaniston va BAA o‘rtasida manfaatlar doirasidagi hamkorlik masalalari hamda investitsiya loyihalarini muhokama qiladi.
2020-yil oktabr oyida bo‘lib o‘tgan Turkmaniston va BAA o‘rtasidagi hamkorlik bo‘yicha qo‘shma qo‘mitaning uchinchi yig‘ilishida 2021-yilda Dubayda bo‘lib o‘tadigan Butunjahon ko‘rgazmasiga tayyorgarlik masalasi ko‘rib chiqilgandi. Ko‘rgazmada Turkmaniston barqaror rivojlanish va innovatsiyalar sohasida o‘zining ilg‘or tajribalarini namoyish etishni rejalashtirmoqda.
Shu bilan birga, yig‘ilishda Ashxobod energetika va infratuzilma loyihalarini amalga oshirish, xususan, Turkmaniston-Afg‘oniston-Pokiston-Hindiston gaz quvuri qurilishida hamkorlikka ochiq ekani ta’kidlangan.
Tomonlar, shuningdek, “yashil iqtisodiyot”ning muhim ekanini ta’kidlab, barqaror energiya manbalaridan foydalanish, innovatsion texnologiyalarni targ‘ib qilish va qayta tiklanadigan energiya sohasida ekspert mahoratlari to‘g‘risida fikr almashgan. Shu nuqtayi nazardan, Turkmaniston Xalqaro qayta tiklanadigan energiya agentligi (IRENA) doirasidagi hamkorlikni kengaytirishga qiziqish bildirgan.
2021-yil fevral oyida Abu-Dabi taraqqiyot jamg‘armasi Turkmaniston hukumati bilan turli sohalardagi infratuzilma loyihalari, shu jumladan qayta tiklanadigan energiya va havo transporti bo‘yicha uchta kelishuv memorandumini imzolagan edi.
