Абу-Даби тараққиёт жамғармаси (АDFD) ва Туркманистон ҳукумати ўртасида 10 июнь куни қиймати 99,91 миллион доллар бўлган иккита битим имзоланди. Бу ҳақда БАА оммавий ахборот воситаларига таяниб, «Интерфакс» хабар берди.
Хабарга кўра, битимлардан бири Туркманистоннинг Болқон минтақасидаги Жебел шаҳрида аэропорт қурилишини молиялаштиришни назарда тутади, иккинчиси 10 МВт қувватга эга гибрид электр станциясини қуришни молиялаштиришни кўзда тутади.
Битимлар АDFD бош директори Муҳаммад Сайф ал-Сувайдий ва Туркманистон Ташқи иқтисодий алоқалар давлат банки раиси Раҳимберди Жепаров томонидан БААда ўтказилган учрашув давомида имзоланди.
Учрашувда, шунингдек, БАА Энергетика ва инфратузилма вазири Суҳайл ибн Муҳаммад Фараж Фарис ал-Мазруий ҳамда ва Туркманистон Олий назорат палатаси раиси, бош вазир ўринбосари Сердар Бердимуҳамедов ва ҳар икки томоннинг бошқа расмийлари иштирок этган.
Жебел аэропорти лойиҳаси Болқон минтақасида ҳаво транспорти инфратузилмасини яхшилаш, Марказий Осиёда ҳудудий ҳаво алоқасини кучайтириш ва транспорт хизмати сифатини ошириш орқали сармояларни жалб қилишга қаратилган. Лойиҳа доирасида соатига 100 нафар йўловчини ўтказиш имкониятига эга терминал қурилади.
Таъкидланишича, лойиҳа таркибий қисмлари лойиҳани режалаштириш, дизайнлаш, қуриш ва етказиб бериш, шунингдек аэропорт ходимларини ўқитишдан иборат.
Туркманистон ОАВлари хабар беришича, президент Гурбангули Бердимуҳамедовнинг буйруғи билан ўзаро манфаатли шерикликни ривожлантириш бўйича музокаралар ўтказиш учун Туркманистон ҳукумат делегацияси 9 июнь куни БААга жўнаб кетган эди.
Абу-Даби ва Дубай шаҳарларида бўлиб ўтадиган уч кунлик музокаралар давомида томонлар Туркманистон ва БАА ўртасида манфаатлар доирасидаги ҳамкорлик масалалари ҳамда инвестиция лойиҳаларини муҳокама қилади.
2020 йил октябрь ойида бўлиб ўтган Туркманистон ва БАА ўртасидаги ҳамкорлик бўйича қўшма қўмитанинг учинчи йиғилишида 2021 йилда Дубайда бўлиб ўтадиган Бутунжаҳон кўргазмасига тайёргарлик масаласи кўриб чиқилганди. Кўргазмада Туркманистон барқарор ривожланиш ва инновациялар соҳасида ўзининг илғор тажрибаларини намойиш этишни режалаштирмоқда.
Шу билан бирга, йиғилишда Ашхобод энергетика ва инфратузилма лойиҳаларини амалга ошириш, хусусан, Туркманистон-Афғонистон-Покистон-Ҳиндистон газ қувури қурилишида ҳамкорликка очиқ экани таъкидланган.
Томонлар, шунингдек, «яшил иқтисодиёт»нинг муҳим эканини таъкидлаб, барқарор энергия манбаларидан фойдаланиш, инновацион технологияларни тарғиб қилиш ва қайта тикланадиган энергия соҳасида эксперт маҳоратлари тўғрисида фикр алмашган. Шу нуқтаи назардан, Туркманистон Халқаро қайта тикланадиган энергия агентлиги (IRENА) доирасидаги ҳамкорликни кенгайтиришга қизиқиш билдирган.
2021 йил февраль ойида Абу-Даби тараққиёт жамғармаси Туркманистон ҳукумати билан турли соҳалардаги инфратузилма лойиҳалари, шу жумладан қайта тикланадиган энергия ва ҳаво транспорти бўйича учта келишув меморандумини имзолаган эди.
Изоҳ (0)