24-maydan 29-maygacha bo‘lgan davrda Toshkent shahrida atmosfera havosidagi changning ruxsat etilgan o‘rtacha kunlik kontsentratsiyasi 2,7 baravarga oshib ketgan. Bu haqda 13 ta statsionar postda havoning ifloslanish kuzatuvlari borasida olib borilgan monitoring ma’lumotlariga tayanib, “O‘zgidromet” xabar berdi.
Foto: “Daryo” / Madina Nurman
Ma’lum qilinishicha, ushbu davr mobaynida azot dioksidining 1,3 baravarga, vodorod ftoridning esa 2 baravarga oshishi qayd etilgan.
Eslatib o‘tamiz, Toshkent shahrida 29-may kuni soat 21:00 atrofida boshlanib, taxminan, bir soatdan ortiq davom etgan kuchli shamol chang bo‘ronlarini keltirib chiqargan. Shu kuni chang bo‘roni sabab Buxorodan kelayotgan charter reys Toshkentga qo‘na olmagan. Shuningdek, 1-iyun kuni Qarshi—Samarqand yo‘lida qum bo‘roni, 31-may kuni Namanganda, 2-iyun kuni Buxoroda kuchli shamol va chang bo‘ronlari kuzatilgan.
“O‘zgidromet”ning yozishicha, O‘zbekiston, shuningdek, Markaziy Osiyoning barcha hududlari uchun changli bo‘ron juda tez-tez uchraydigan hodisa hisoblanadi. Ko‘pincha bunday hodisalar qurg‘oqchil hududlarda — cho‘l va yarim cho‘l hududlarda sodir bo‘ladi.
“Toshkent qurg‘oqchil hudud hisoblanmaydi, lekin so‘nggi yillarda O‘zbekistonda va Toshkent shahrida jadal sur’atlar bilan olib borilayotgan qurilishlar juda katta miqdordagi qum va changning paydo bo‘lishiga sabab bo‘lmoqda, ular hatto kuchsiz shamol esganda ham havoga ko‘tariladi”, — deyiladi xabarda.
