Iqtisodiy tadqiqotlar va islohotlar markazi direktori Obid Hakimov O‘zbekistonda kuniga 5600 so‘m ishlab topgan shaxs kambag‘al deb hisoblanmasligini aytgan edi. Jahon banki mutaxassisi Uilyam Zeyts nega bir kishi uchun kuniga 1,9 dollar nisbati endi O‘zbekiston uchun ahamiyatli emasligini tushuntirdi. Bu haqda Repost xabar qildi.
Ta’kidlanishicha, kambag‘allikning xalqaro darajasi Jahon banki tomonidan chop etilgan konsepsiya bo‘lib, u har bir kishi uchun sotib olish qobiliyati bo‘yicha kuniga 1,9 AQSh dollari miqdorida belgilangan.
Jahon banki mutaxassisi Uilyam Zeytsning so‘zlariga ko‘ra, kambag‘allikning chegarasini hisoblash uchun dunyodagi yoki mintaqadagi eng kam daromadli mamlakatlar va ularning kambag‘allik darajasi olinadi.
“Eng kambag‘al mamlakatlarning kambag‘allikni belgilovchi chegarasi juda past ekanini bilasiz. Biz mintaqadagi yoki dunyodagi eng kambag‘al mamlakatlar orasida o‘rtacha nisbatni olamiz. Bu nisbat O‘zbekiston singari davlatlar uchun juda past hisoblanadi. Chunki O‘zbekiston kambag‘al mamlakat emas”, — dedi Uilyam Zeyts.
Qayd etilishicha, kambag‘allik chizig‘i (1,9 dollar) 2011-yilda o‘rnatilgan va endi O‘zbekiston uchun bu hisob-kitob ahamiyatsiz.
“Yana bir bor aniqlik kiritmoqchimanki, kambag‘allikni belgilaydigan chegara haqida gap ketganda, kuniga bir kishi uchun 1,9 AQSh dollari haqida gaplashamiz. Bu yerda biz dollar kursini so‘mga shunchaki o‘girib qo‘ymaymiz. Aksariyat odamlar shunda adashadi. Kambag‘allik chegarasini hisoblash uchun biz shunchaki dollarni so‘mga ayirboshlamasligimiz kerak”, — deya ta’kidladi Uilyam Zeyts.
Unga ko‘ra, O‘zbekistonda yashash narxi, dastlab, dunyoning barcha boshqa mamlakatlari bilan tenglashtiriladi. Tenglashtirish natijasida chiqqan koeffitsiyent olinadi. Ana shu koeffitsiyent orqali sotib olish qobiliyati pariteti belgilanadi.
“Bu oddiy kurs emas, balki boshqa — juda muhim kurs. Ya’ni 1,9 dollarni oddiy valyuta kursi bo‘yicha olish va qayta hisoblash kerak emas”, — dedi Jahon banki eksperti.
Shuningdek, bundan tashqari boshqa kambag‘allik chegaralari mavjudligi ta’kidlangan, Ular:
- daromad darajasi o‘rtachadan past bo‘lgan mamlakatlar uchun 3,2 dollar;
- daromad darajasi o‘rtachadan yuqori mamlakatlar uchun 5,6 dollar.
Bundan avval O‘zbekistonda pandemiya sharoitida kambag‘allik ko‘rsatkichi yana 1,5 baravarga ortgani hamda Obid Hakimov muhokamalarga sabab bo‘lgan 5600 so‘m bo‘yicha izoh bergani haqida xabar berilgandi.
Izoh (0)