Islom sivilizatsiyasi markazida dunyodagi eng katta Qur’oni karim sahifasini qo‘lda ko‘chirish ishlari yakunlandi. U Ginnesning rekordlar kitobiga kirishi mumkin

Toshkentdagi Islom sivilizatsiyasi markazida dunyodagi eng katta qo‘lyozma Qur’oni karim sahifasini qo‘lda ko‘chirish ishlari yakuniga yetdi. Bu haqda Islom sivilizatsiyasi markazi direktori Shoazim Minovarov ma’lum qildi.

Shoazim Minovarovning ma’lum qilishicha, ushbu sahifa Boysunqor Mirzo tomonidan otasi sulton Shohrux Mirzo uchun maxsus ko‘chirilgan Boysunqur Qur’oni sahifasining biroz kattalashtirilgan takrori.

Sahifani markaz xattoti, Toshkent Islom instituti bitiruvchisi Najmiddin Fayoziy Nuriddin o‘g‘li 6 oy mobaynida ko‘chirgan.

Maxsus qog‘oz Yaponiyadan, bo‘yoqlar Turkiyadan keltirilgan va sahifaga o‘zbek oltini suvi bilan hal berilgan. Sahifa Islom sivilizatsiyasi markazidagi Usmon Qur’oni uchun jihozlanayotgan xonaqohdan joy oladi.

Islom sivilizatsiyasi markazi qo‘lyozma Qur’on sahifasini Ginnesning rekordlar kitobiga kiritish yuzasidan muzokaralar olib borishga kirishdi.

Bundan  avval O‘zbekistondagi Islom sivilizatsiyasi markazi qurilishi 2021-yilning oxirida yakunlanishi hamda Shavkat Mirziyoyev Islom sivilizatsiyasi markazining qurilish jarayonini ko‘zdan kechirgani haqida xabar berilgandi.