Myanmadagi to‘ntarish natijasida hokimiyatga kelgan harbiylar mamlakat aholisiga sun’iy yo‘ldosh antennalaridan foydalanishni taqiqladi. Bu haqda Myanmaning MRTV davlat teleradiokompaniyasiga asoslanib Reuters xabar bermoqda.
Foto: FreeAds
“Sun’iy yo‘ldosh televideniyesi endi qonuniy emas. Televizion va videotasvirlar to‘g‘risidagi qonunni buzgan har bir kishi, ayniqsa, sun’iy yo‘ldosh antennalaridan foydalanganlar bir yil muddatga ozodlikdan mahrum qilish va 500 ming kyat (320 dollar) jarima bilan jazolanadi”, — deydi MRTV.
Aprel oyida Myanmaning mustaqil gazetasi The Irrawaddy harbiylar Myanma aholisidan sun’iy yo‘ldosh antennalarini tortib olishni boshlagani haqida xabar bergan edi. Bunga harbiylar tomonidan taqiqlangan ba’zi telekanallarning sun’iy yo‘ldosh antennalari orqali translyatsiyani davom ettirishi sabab bo‘lgan.
Myanmadagi davlat to‘ntarishidan keyin harbiylarga qarshi namoyishlar boshlandi. Buning fonida yangi hokimiyat avval mamlakatda eng ommabop ijtimoiy tarmoq bo‘lgan Facebook’ni taqiqladi, so‘ngra mamlakatda internet deyarli butunlay uzib qo‘yildi, barcha tillardagi Wikipedia bloklandi.
Myanmada to‘ntarishdan beri 760 dan ortiq odam o‘ldirilgan, ularning 50 dan ortig‘i bolalar. 4800 dan ortiq odam, xususan, 80 nafar jurnalist hibsga olingan. BMT to‘ntarish va pandemiya tufayli 54 million kishi yashaydigan mazkur mamlakat aholisining qariyb yarmi 2022-yilda qashshoqlik chegarasidan tushib ketishi mumkinligini bashorat qildi.
