Qashqadaryoda 80 km masofadan ichimlik suv keltirishga mo‘ljallangan Oqsuv—Dehqonobod loyihasining birinchi bosqichi ishga tushdi

Qashqadaryo viloyatining Dehqonobod tumanida 2018-yil qurilishi boshlab yuborilgan Oqsuv—Dehqonobod loyihasining dastlabki bosqichi ishga tushdi. Toza ichimlik suvi keltirilishiga bag‘ishlangan tadbirda bosh vazir o‘rinbosari Ochilboy Ramatov ham ishtirok etdi, deya xabar berdi “Daryo” muxbiri.

Ta’kidlanishicha, Oqsuv—Dehqonobod loyihasi buyurtmachisi “O‘zsuvta’minot” AJ bo‘lib, loyihachi sifatida “O‘zbekkommunalloyihaqurilish” DUK va bosh pudratchi etib “O‘zbekiston temir yo‘llari” AJning “Maxsus mexanizatsiyalashgan yo‘l stansiyasi” belgilab olingan.

Dehqonobod hokimi o‘rinbosari Sherdil Ergashevning ma’lumot berishicha, ayni kunga qadar tog‘dan 78,8 km ichimlik suv quvuri tortib kelingan bo‘lib, mazkur quvurlar orqali bir sutkada tuman markaziga 10 ming 800 metr kub toza ichimlik suv keladi. Shuningdek, hozirga qadar 2 ta 500 metr kublik suv saqlash hovuzi, 1 ta suv taqsimlash inshooti qurilishi yakunlangan.

Loyiha to‘liq ishga tushgach, tumanning 78 foizi yoki 116 ta qishloqdagi 113 ming aholi toza ichimlik suvi bilan ta’minlanadi.

Qo‘shimcha qilinishicha, qurilish ishlari 2018-yilda boshlangan bo‘lib, loyihaga jami 268 milliard 400 million so‘m mablag‘ ajratilgan. Ayni kunga qadar 226 milliard 400 million so‘mlik qurilish-montaj ishlari bajarilgan.