O‘zbekiston Moliya vazirligi 2021-yilning 1-choragida budjet mablag‘lari maqsadli sarflanishi yuzasidan Davlat moliyaviy nazorati departamenti va uning hududiy boshqarmalari tomonidan o‘tkazilgan nazorat ishlari natijasini e’lon qildi.

Foto: “Daryo”

Nazorat tadbirlarida 211,2 milliard so‘m miqdorida budjet intizomini buzish, pul va tovar-moddiy boyliklar kamomadi va asossiz xarajatlar aniqlangan. Shundan 192,3 milliard so‘m budjetga qaytarilgan.

Xalq ta’limi vazirligi tizimida 43,3 milliard so‘m miqdorida qonunbuzilish holatlari aniqlanib, bu 2020-yil 1-choragiga (9,4 milliard so‘m) nisbatan 4,6 martaga ko‘p.

Sog‘liqni saqlash vazirligi tizimida 23,3 milliard so‘m miqdorida qonunbuzilish holatlari aniqlanib, bu 2020-yilning shu davriga (7,9 milliard so‘m) nisbatan 2,9 martaga oshgan.

Maktabgacha ta’lim vazirligi tizimida 41,2 milliard so‘m miqdorida qonunbuzilish holatlari aniqlanib, 2020-yil 1-choragiga (5,4 milliard so‘m) nisbatan qonunbuzilish holatlari 7,6 martaga oshgan.

Uy-joy kommunal xizmat ko‘rsatish vazirligi tizimida 22,4 milliard so‘m miqdorida qonunbuzilish holatlari aniqlangan (2020-yil 1-chorakda 135,4 million so‘mlik qonunbuzilish holatlari aniqlangan).

Transport vazirligi huzuridagi Avtomobil yo‘llari qo‘mitasi tizimida 16,1 milliard so‘m miqdorida qonunbuzilish holatlari aniqlangan (2020-yil 1-chorakda 767 million so‘mlik qonunbuzilish holatlari aniqlangan).

Shuningdek, Qishloq xo‘jaligi (3,3 milliard so‘m), Jismoniy tarbiya va sport (3 milliard so‘m), Bandlik va mehnat munosabatlari (2,7 milliard so‘m), Suv xo‘jaligi (2,5 milliard so‘m), Oliy va o‘rta maxsus ta’limi (2,2 milliard so‘m) vazirliklari, O‘rmon xo‘jaligi davlat qo‘mitasi (2,7 milliard so‘m) va ular tizimidagi budjet tashkilotlarida ham yirik miqdorda moliyaviy qonunbuzilish holatlari aniqlangan.

Bundan tashqari, hokimiyatlar (3,4 milliard so‘m), hokimliklarning obodonlashtirish boshqarmalari (2,9 milliard so‘m), hokimiyatlar huzuridagi “Yagona buyurtmachi xizmati” injiniring kompaniyalari (34,2 milliard so‘m)da o‘tkazilgan nazorat tadbirlarida ham moliyaviy qonunbuzilish holatlariga yo‘l qo‘yilganligi aniqlangan.

Budjet qonunchiligini buzganligi uchun budjetdan mablag‘ oluvchi tashkilotlarning 9 nafar rahbar va boshqa mansabdor shaxslariga ma’muriy huquqbuzarlik to‘g‘risidagi bayonnomalar tuzilib, ko‘rib chiqish uchun Ma’muriy sudlarga yuborilgan. Shuningdek, 1458 ta nazorat tadbirida aniqlangan 210,1 milliard so‘mlik qonunbuzilish holatlariga qonuniy choralar ko‘rish uchun huquqni muhofaza qiluvchi organlarga yuborilgan.