Арманистон парламенти 3 май куни бўлиб ўтган махсус йиғилишда республика бош вазирлигига ягона номзод бўлган Никол Пашинянни эгаллаб турган лавозимига қайта сайламади, деб ёзмоқда «Интерфакс».
«Менинг қадамим» бошқарувчи фракцияси овоз беришда бетараф қолди, «Обод Арманистон» мухолифат партияси мажлисда иштирок этмади, «Ёрқин Арманистон» мухолифатчи партияси эса қарши овоз берди.
Овоз бериш жараёни парламентни тарқатиб юбориш ва муддатидан олдин парламент сайловларини ўтказиш мақсадида ташкил этилди.
Арманистон Конституциясига мувофиқ, бош вазир истеъфога чиққан тақдирда парламент етти кун ичида ушбу лавозимга номзодларни кўрсатади ва сайловлар ўтказилади. Етти кундан кейин янги бош вазир сайланмаган тақдирда янги сайловлар ташкил этилади. Агар у кўпчилик овоз билан қайта сайланмаса, Миллий мажлис қонунга биноан тарқатиб юборилади.
Арманистон парламенти сайловларининг иккинчи босқичи 2021 йилнинг 10 май куни ўтказилади.
Парламент тарқатиб юборилгандан кейин мамлакат президенти расман навбатдан ташқари парламент сайловларида овоз бериш санасини белгилайди.
Сайлов 20 июнь куни бўлиб ўтиши кутилмоқда.
Аввалроқ Никол Пашинян Facebook орқали халққа мурожаат қилиб, истеъфо берганини эълон қилди. Пашиняннинг аниқлик киритишича, 20 июнда бўлиб ўтадиган парламентга навбатдан ташқари сайловларгача у ҳукумат раҳбари вазифасини вақтинчалик бажарувчи бўлиб туради.
Эслатиб ўтамиз, Арманистондаги сиёсий инқироз ҳамда Пашиняннинг истеъфосини талаб қилувчи норозилик намойишлари 2020 йил 10 ноябрда ҳукуматнинг Россия ва Озарбайжон раҳбарлари билан Тоғли Қорабоғдаги ҳарбий ҳаракатларни тўхтатиш тўғрисида қўшма баёнот имзолангандан сўнг бошланди. Ушбу шартномага биноан Боку Қорабоғ ҳудудининг бир қисми устидан назоратни қўлга киритди. Пашиняннинг сиёсий мухолифлари ва оппозиция тарафдорлари сулҳ шартларидан норози бўлиб, бош вазирни Озарбайжонга таслим бўлган ва ўз халқига хиёнат қилганликда айблади. Олимлар, маданият арбоблари, барча католик арманлар роҳиби Гарегин II, Арманистоннинг уч нафар собиқ президенти, шунингдек, Бош штаб қўмондонлиги Пашинянни истеъфога чиқишга чақирди.
Ички сиёсий инқирозни ҳал қилиш учун Пашинян мамлакатда 20 июнь куни муддатидан олдин парламент сайловлари ўтказилишига ва сайловлар ўтказилиши учун апрелда истеъфога чиқишга ваъда берди. «Апрель ойида мен вазифамни тарк этиш учун эмас, балки муддатидан олдин парламент сайловлари ўтказилиши учун истеъфога чиқаман. Ушбу давр мобайнида мен бош вазир вазифасини бажарувчи сифатида фаолиятимни давом эттираман», — деди Пашинян. Пашинян Арманистон халқига мурожаат қилар экан, сайловчилар томонидан қўллаб-қувватланган тақдирда мамлакатга аввалгидан ҳам яхшироқ хизмат қилишга ваъда берди. Агар фуқаролар унинг жамоасини қўллаб-қувватламаса, у ҳолда Пашинян ҳокимиятни топширишга сўз берди.
Шунингдек, Арманистон бош вазири Никол Пашиняннинг мамлакат жанубидаги Агардак шаҳрига ишчи сафари чоғида бир неча юзлаб маҳаллий аҳоли унинг ташрифига қарши норозилик намойиши ўтказган эди.
Изоҳ (0)