Rossiyada Xiaomi va Mercedes hamkorligida yaratilgan birinchi elektrosamokat paydo bo‘ldi

2020-yilning fevralida Xitoyning Xiaomi kompaniyasi “Formula-1”dagi Mercedes-Benz jamoasi bilan hamkorlikda elektrosamokat yaratayotgani ma’lum bo‘lgandi. Hi-Tech.Mail.ru’ning yozishicha, aprel oyida hamkorlikda yaratilgan samokat Rossiyada sotuvga chiqadi.

Xiaomi Mercedes avtomobil ishlab chiqaruvchisi bilan hamkorlikda yaratilgan Mi Electric Scooter Pro 2 Petronas F1 elektrosamokatining savdolari rasman boshlanishini e’lon qildi. Rossiyada savdolar 23-apreldan 1100 dollar qiymatida boshlanadi, oldindan buyurtmalarni esa hozirdan amalga oshirish mumkin.

Mi Electric Scooter Pro 2 Petronas F1 — elektrosamokatlar orasida flagman yechim hisoblanadi, chunki u bazaviy modellardan bir necha barobar qimmat. Birinchi navbatda samokat o‘zining avtonomligi bilan ajralib turadi — u bir marta quvvatlanish orqali 45 kilometr yo‘l bosishi, shuningdek, soatiga 25 kilometr tezlikda ham harakatlanishi mumkin.

Bundan tashqari, samokat ikkitalik tormoz tizimi, pnevmatik amortizator shinalari va tezlik, quvvat darajasi hamda qo‘shimcha ma’lumotlar uchun mo‘ljallangan displeyga ega. Elektrosamokat shahar bo‘ylab harakatlanish uchun yaratilgani sabab uni yig‘ish oson va kam joy egallaydi.

Avvalroq Xiaomi bir marta quvvatlanish orqali 30 km yura oladigan yangi elektrosamokat taqdim etgani to‘g‘risida xabar berilgandi.