“Daryo”ni Telegram’da o‘qing! Join!
09:09, 21.04.2021 26284

Putinning murojaati va norozilik aksiyasi arafasida Moskvadagi Manej maydoniga to‘siqlar o‘rnatildi

Rossiya poytaxti Moskvadagi Manej maydoniga metall to‘siqlar o‘rnatildi. Bu haqda “Dojd” telekanaliga tayanib, Meduza xabar berdi.

Xabarga ko‘ra, Rossiya prezidenti Vladimir Putin 21-aprel kuni Manejda Federal Majlisga murojaat yo‘llaydi. Shuningdek, Moskva meriyasiga ushbu sanada Manej maydonida Aleksey Navalniyni qo‘llab-quvvatlovchi aksiya o‘tkazish haqida ariza kelib tushgan. Shahar hokimiyati bunga rozilik bermadi.

OAV manbalarining xabar berishicha, Moskvadagi aksiya kuni Kremlga tutash barcha asosiy ko‘chalar va maydonlar to‘sib qo‘yiladi. Boshqa shaharlarda ham rasmiylar turli vajlar bilan asosiy ko‘chalarni to‘sib qo‘yishga qaror qildi. Masalan, Kostromada bu markaziy va boshqa maydonlardagi harakat zonasini qayta ishlab chiqish, Yekaterinburgda esa harbiy parad uchun mashq qilish bilan izohlandi. Shuningdek, Sankt-Peterburgdagi Nevskiy prospektida va Saroy maydonida ham to‘siqlar o‘rnatildi.

Avvalroq moskvalik olim Navalniy bilan birdamlik belgisi sifatida ochlik e’lon qilgan edi. O‘nlab odamlar uni qo‘llab-quvvatlagan. Olim o‘z harakatining asosiy maqsadi koloniyadagi Navalniyni shifokor tekshiruvdan o‘tkazishga va unga malakali tibbiy yordam ko‘rsatishga chaqirish ekanini ta’kidlagan.

31-mart kuni Navalniy ochlik e’lon qilgan edi. U beli va oyog‘ida og‘riq zo‘raygani, ammo unga kerakli dorilar berilmagani va shifokorlar yuborilmagani sababli shunday qarorga kelganini aytgan.

The New York Times tahririyati Rossiya prezidenti Vladimir Putinga muxolifatchi Aleksey Navalniyni shifokor ko‘rigidan o‘tkazish, uning ahvoli qay darajada og‘irligini baholash va agar zarur bo‘lsa, siyosatchini intensiv terapiyaga yuborish so‘rovi bilan murojaatnoma e’lon qildi. “Agar Putin Navalniyning koloniyada o‘lishiga qo‘yib bersa, ‘qotil’ degan nomni oqlagan bo‘ladi”, — dedi murojaat mualliflari.

Shuningdek, AQSh prezidenti ma’muriyati siyosatchi Aleksey Navalniy koloniyada vafot etgan taqdirda Rossiyani javobgarlikka tortish bo‘yicha bir nechta choralarni ko‘rib chiqmoqda.

Boshqa yangiliklar