Armaniston bosh vaziri Nikol Pashinyan Rossiya prezidenti Vladimir Putin bilan Moskvada o‘tkazilgan muzokaralar chog‘ida Putinga Armanistonda yangi AES qurish imkoniyatini ko‘rib chiqishni taklif qildi. Bu haqda “Sputnik Armeniya”ga tayanib, “RBK”xabar berdi.
Foto: “TASS”
“Umid qilamanki, bugun biz strategik investitsiyalar bilan bog‘liq ba’zi masalalarni muhokama qilamiz. Shu nuqtai nazardan bugun siz bilan Armaniston Respublikasida yangi atom elektr stansiyasini qurish imkoniyatlarini muhokama qilmoqchiman”, — dedi Pashinyan. U mintaqada savdo-iqtisodiy aloqalarni va transport yo‘llarini tiklash imkoniyatini “nihoyatda muhim masala” deb atadi, shundagina Armaniston rivojlanish uchun yangi istiqbollarga ega bo‘lishini ta’kidladi. Hozir mamlakatda mavjud Armaniston atom elektr stansiyasi 1969-yildan 1977-yilgacha Metsamor shahri yaqinida qurilgan. Stansiya VVER-440 reaktorlari bo‘lgan ikkita energiya blokidan iborat.
Avvalroq muzokaralar to‘g‘risidagi e’londa uchrashuvning asosiy mavzularidan biri mintaqadagi transport kommunikatsiyalari harakatini blokdan chiqarish shartlari bo‘lishi, bu esa 2020-yil 9-noyabrda Tog‘li Qorabog‘da urushni tugatgan uch tomonlama tinchlik shartnomasida nazarda tutilgani aytib o‘tilgan edi.
“Muzokarada Rossiya, Armaniston va Ozarbayjon rahbarlarining 2020-yil 9-noyabr va 2021-yil 11-yanvardagi Tog‘li Qorabog‘ to‘g‘risidagi bayonotlarini amalga oshirish borasidagi ishlarni, shuningdek, mintaqadagi mavjud muammolarni, xususan, Janubiy Kavkazdagi iqtisodiy va transport aloqalarini tiklash sharoitini hal qilish bo‘yicha keyingi qadamlarni ko‘rib chiqish rejalashtirilgan”, — degan edi Kreml.
2020-yil iyul oyida Armaniston va Ozarbayjon o‘rtasidagi mojaroning navbatdagi keskinlashuvi paytida Boku Metsamor shahri yaqinidagi AESga yuqori aniqlikdagi raketa zarbasi berish imkoniyatini e’lon qildi. “Armaniston unutmasligi kerakki, Ozarbayjon Qurolli Kuchlari safida xizmat qilayotgan so‘nggi raketa tizimlari Metsamor AESga aniq zarba berishga qodir, bu esa Armaniston uchun falokat bo‘ladi”, — degan edi Ozarbayjon Mudofaa vazirligi matbuot xizmati rahbari polkovnik Vagif Dargyaxl. Yerevanda bu bayonotlar davlat miqyosidagi terrorizmining namoyishi va “Ozarbayjonning genotsid niyatlari” ifodasi sifatida baholandi.
Shuningdek, 2021-yil 11-yanvarda Rossiya, Armaniston va Ozarbayjon rahbarlari Tog‘li Qorabog‘ni rivojlantirish bo‘yicha qo‘shma bayonotni imzolagan edi. Unda mintaqadagi iqtisodiy va transport infratuzilmasi muammolarini hal qilish uchun bosh vazir o‘rinbosarlari darajasida ishchi guruh tuzilgan. Ishning asosiy yo‘nalishlaridan biri Ozarbayjon va Armaniston orqali o‘tadigan xalqaro transport aloqasini blokdan chiqarish, infratuzilma obyektlarini tiklash va yangilarini qurishdan iborat, deb belgilangan edi.
Shuningdek, muzokaralar davomida Putin Pashinyanga Armanistonning COVID-19 vaksinasiga bo‘lgan ehtiyojini qondirishga va’da berdi.
“Bizning vaksinalarimiz juda katta hajmda ishlab chiqarilmoqda. Shuning uchun men Armanistonga vaksina yetkazish masalasini Rossiya fuqarolari va iste’molchilariga zarar yetkazmasdan, hal qilamiz deb o‘ylayman”, — dedi Putin Pashinyan bilan muzokaralar paytida. Armaniston bosh vaziri Rossiyaning “Sputnik V” vaksinasining birinchi partiyasi 8-aprel, payshanba kuni 15 ming dozada kelishi kerakligini aytdi va umuman olganda, uning so‘zlariga ko‘ra, mamlakatda koronavirusga qarshi vaksinaning 1 milliondan ortiq dozasiga talab bor.
“Birinchi partiya — ramziy partiyadir. Biz katta miqdordagi rus vaksinasini sotib olishga umid qilamiz, chunki u o‘zining samaradorligini isbotlagan”, — deya ta’kidladi Pashinyan.
Putin Rossiyada koronavirusga qarshi vaksinalar ishlab chiqarish hajmi mamlakat ichidagi ehtiyoj bilan taqqoslanishini ta’kidladi. Rossiyada emlash kampaniyasi davom etar ekan, aksariyat odamlar vaksina olishni xohlamoqda, deya qo‘shimcha qildi u. “Mamlakatimizda vaksina ishlab chiqarish hajmi va bizning vaksinamizni olishni istaganlar soni bir-biriga muvofiq keladi va hatto ta’minotning biroz ustunligi bor. Shu bilan birga, ishlab chiqarish hajmi o‘sib bormoqda”, — dedi Rossiya rahbari.
Avvalroq Rossiya prezidenti Vladimir Putin va Turkiya prezidenti Rajab Toyyib Erdo‘g‘on videokonferensaloqa rejimida Turkiyadagi “Akkuyu” atom elektr stansiyasining (AES) uchinchi energiya bloki qurilishiga start bergan edi.
