UzAuto Motors kompaniyasi Chevrolet Malibu-2 modellari, shuningdek, yangilangan Equinox va Tracker narxlarini keskin oshirdi. Ushbu avtomobillarning narxi nega oshgani yuzasidan kompaniya izoh berdi, deya xabar qilmoqda “Gazeta.uz”.

Foto: “Daryo” / Madina Nurman

Ma’lumot uchun, ijtimoiy tarmoq foydalanuvchilari mart oyi oxirida ushbu modellarga narxlar ko‘tarilgani haqida xabar berdi. Xususan, lyukli Malibu-2 LTZ 2.0 l (turbo) narxi 324,4 milliondan 369 million so‘mgacha (13,7 foizga), yangilangan Equinox 349 milliondan 414 million so‘mgacha (18,6 foizga), Tracker 240 million so‘mgacha oshdi.

UzAuto Motors’ning ta’kidlashicha, 2017-yil aprel oyida O‘zbekiston bozorida ikkinchi avlod Malibu avtomobillari paydo bo‘lgan va har bir yangi Malibu modelining narxi avtomobil modifikatsiyasi asosida tasdiqlangan va bu vaqt mobaynida biron marta narxi o‘zgarmagan.

Kompaniyaning qo‘shimcha qilishicha, ikki litrli turbomotorli Malibu LTZ Premier Facelift’ning so‘nggi versiyasi 2019-yil oktabr oyida sotuvga chiqarilgan, uning narxi 2021-yil martigacha o‘zgarmagan.

“Dollarning o‘sishi (30 foizdan ortiq), Janubiy Koreya vonining dollarga nisbatan mustahkamlanishi (10—15 foizga), pandemiya bilan bog‘liq logistika narxining global o‘sishi va boshqa omillar ushbu model narxlarini yangilash uchun asosiy sabab bo‘ldi”, — deyiladi kompaniya axborotida.

Tracker’ga kelsak, UzAuto Motors’ning xabar berishicha, yangilangan modelga iqlim nazorati, sun’iy teri bilan ishlangan haydovchi o‘rindig‘i va o‘rindiqlarning elektr sozlamalari va boshqa imkoniyatlar qo‘shilgan.

Equinox RS avtomobiliga esa LED optikasi, moslashuvchan kruiz nazorati, avtoturargohdan chiqib ketayotganda orqa trafik harakati to‘g‘risida ogohlantirish, ko‘rinmas hudud kuzatuvi, old o‘rindiqning ventilyatsiyasi, premium ovozli tizimlar, xavfsizlik tizimlari va boshqalar qo‘shilgan.

Eslatib o‘tamiz, avvalroq kompaniya Equinox va Tahoe’larning yuqori narxi orqali Spark va Nexia kabi arzon mashinalarni ishlab chiqarishdagi zarar qoplanayotganini ma’lum qilgandi.

Bundan avval UzAuto Motors yangilangan Lacetti Redline avtomobilini taqdim etgani, UzAuto Motors Italiya va Janubiy Koreyada ishlab chiqarilgan nosoz ehtiyot qismlari sabab 13 mingta mashinaga bepul xizmat ko‘rsatgani hamda UzAuto Motors kompaniyasi barcha avtomobillar narxini pasaytirish ustida ishlanayotganini ma’lum qilgani haqida xabar berilgandi.