“Prezidentlar avtomobili”dan tortib tez yordam mashinalarigacha: Toshkentdagi “Innoprom” ko‘rgazmasida namoyish etilgan avtomobillar (foto)

7-aprel kuni “O‘zekspomarkaz” ko‘rgazmalar majmuasida ikki kun davom etgan “Innoprom—2021” xalqaro sanoat ko‘rgazmasi o‘z ishini yakunladi. Ko‘rgazma muloqotlar maydonchasida hamkorlik uchrashuvlariga boy bo‘ldi.

Tashkilotchilar — Rossiya Sanoat va savdo vazirligi hamda O‘zbekiston Investitsiyalar va tashqi savdo vazirligi. Ko‘rgazma ishida O‘zbekiston, Rossiya, Qozog‘iston, Qirg‘iziston, Tojikiston, Turkmaniston, Afg‘oniston va Pokistondan sakkiz mingdan ziyod davlat organlari hamda yirik kompaniyalar vakillari ishtirok etdi.

Tadbir doirasida “Raqamlashtirilgan sanoat”, “Mashinasozlikdagi qo‘shma loyihalar”, “Sanoatni moliyalashtirish”, “Yirik shaharlar uchun innovatsion texnologiyalar”, “Energetika sohasida innovatsiyalar” nomli ixtisoslashtirilgan sessiyalar tashkil etilgan bo‘lib, unda ishtirokchilar sanoatning deyarli barcha tarmoqlarida ilg‘or texnologiyalar evaziga erishilayotgan yutuqlar, zamonaviy yechim va dizaynga ega yangi turdagi mahsulotlarni ishlab chiqarish, ularni sanoatda keng foydalanishga tatbiq etish, savdo-sotiq masalalari yuzasidan fikr almashish imkoniga ega bo‘ldi.

300 dan ortiq ishtirokchi kompaniyalar ikki kun davomida uchrashish, tanishish, turli kelishuv va bitimlar imzolash imkoniyatiga ega edi. 200 dan ortiq eksponentlar o‘z mahsulotlarini namoyish etdi. Ko‘rgazmaning muloqot maydonchasida 200 dan ortiq ishbilarmonlik uchrashuvlari, tematik sessiyalar va davra suhbatlari, biznes loyihalar taqdimotlari tashkil qilindi.

Eng katta e’tibor, shubhasiz, bu yerda namoyish etilgan transport vositalari, avtomobillar, sanoat, qishloq xo‘jaligi texnikalariga qaratildi.

Ko‘rgazmaning ikkinchi zalida taqdim etilgan Aurus avtomobili tashrif buyuruvchilarda haqiqiy katta qiziqish uyg‘otdi. Ushbu avtomobil noldan yaratilgan premium avtomobillarning ilk Rossiya brendi. Ularning ichida limuzin, sedan, yo‘ltanlamas va minivenlar bor. Loyiha 2014-yilda ishga tushirilgan. Aurus avtomobillari davlat rahbarlariga mo‘ljallangan bo‘lib, ushbu savdo belgisining limuzinidan Rossiya prezidenti Vladimir Putin ham foydalanadi.

Bundan tashqari, ko‘rgazmada “GAZ”, “KamAZ” va “AvtoVAZ”ning avtobuslari, tez yordam mashinalari, maxsus texnika va yuk mashinalarini ko‘rish mumkin.