Andijon viloyati Baliqchi tumanidan minib qochilgan Spark Namangan viloyati Davlatobod tumanida ehtiyot qismlariga ajratilgan holda topildi, deb xabar beradi Tergov departamenti.
Ma’lum qilinishicha, Baliqchi tuman IIBga 27 yoshli S. ismli fuqaro murojaat qilib, o‘ziga tegishli Spark avtomobili minib qochilganini bildirgan. Uning so‘zlariga ko‘ra, erkak mashinani 3-aprel kuni soat 22:30 larda yashash uyi oldida eshiklari qulflanmagan holda qarovsiz qoldirib, yashash xonadoniga kirib ketgan.
Olib borilgan tezkor-qidiruv harakatlari davomida ushbu avtomashinaga o‘rnatilgan GPS qurilmasi signali mashina Namangan viloyati To‘raqo‘rg‘on tumani hududida harakatlanayotganligini ko‘rsatgan. Shunga asosan viloyat hududida to‘sib ushlash tadbiri e’lon qilingan va Namangan viloyati Davlatobod tumanida yashovchi 29 yoshli A. ismli fuqaroning yashash xonadonidan S.ga tegishli avtomobilning davlat raqam belgisi yechilib, ehtiyot qismlariga ajratilgan holatda topilgan.
Mazkur holat yuzasidan Andijon viloyati IIB huzuridagi Tergov boshqarmasi tomonidan A.ga nisbatan Jinoyat kodeksining 267-moddasi 2-qismi “g” bandi (transport vositasini olib qochish) bilan jinoyat ishi qo‘zg‘atilib, protsessual tartibda ushlangan.
Hozirda tergov harakatlari olib borilmoqda.
Avvalroq Marg‘ilonda kaliti bilan qoldirilgan Spark’ni minib qochgan shaxs qo‘lga olingani, Navoiyda o‘g‘rilik uchun 5 yil qamalib chiqqan shaxs 2 oy o‘tmay IIB xodimi Lacetti’sini olib qochmoqchi bo‘lgani to‘g‘risida xabar berilgandi.
Izoh (0)