Zomin tumani SEOM rahbarining o‘z xodimlariga nisbatan haqoratomuz va qo‘pol munosabati Senat nazoratiga olindi
“Jizzax viloyati Zomin tumani Sanitariya-epidemiologik osoyishtalik markazi rahbarining o‘z xodimlariga nisbatan haqoratomuz va qo‘pol munosabati” deb tarqatilgan audioyozuv ijtimoiy tarmoqlar hamda jamoatchilik orasida keng muhokama qilinmoqda.
Oliy Majlis Senati matbuot xizmatining ma’lum qilishicha, Senatning Mudofaa va xavfsizlik masalalari qo‘mitasi raisi Qutbiddin Burhonov mazkur holatning qonuniy yechim topishini nazoratga oldi.
Ushbu holat yuzasidan huquqni muhofaza qiluvchi organlarga 15 kun muddatda o‘rganib chiqib, qonuniy qaror qabul qilishni so‘rab, murojaat xati yuborilgan.
Tekshiruv natijasi bo‘yicha qo‘shimcha axborot berilishi aytilgan.
Eslatib o‘tamiz, 2020-yilning iyun oyida ijtimoiy tarmoqlarda Toshkent viloyati Sanitariya-epidemiologik osoyishtalik markazi bosh shifokori Baxtiyor Boltaboyev o‘z kabinetida xodimlarini so‘kayotgani aks etgan video tarqalgan, oqibatda u ishdan olingandi.
Toshkent viloyati hokimligi bunga “rahbar, tibbiyot sohasi vakili uchun sharmandali hol”, deya baho bergan. Baxtiyor Boltaboyev o‘z xodimlaridan, hamkasblaridan va kasaba uyushmalari xodimlaridan uzr so‘ragan.
