Toshkent viloyati hokimiga yangi yordamchi va maslahatchi tayinlandi, viloyat XTB boshlig‘i o‘zgardi

Toshkent viloyati hokimligi matbuot xizmati viloyat hokimiga yangi maslahatchi va yordamchi tayinlangani, shuningdek, boshqa qator lavozim tayinlovlari amalga oshirilgani to‘g‘risida ma’lumot berdi.

Ravshan Yo‘ldoshev Toshkent viloyat hokimining ishlab chiqarishni mahalliylashtirish va sanoatda kooperatsiya aloqalarini kengaytirish masalalari bo‘yicha yordamchisi lavozimiga tayinlandi.

Ravshan Yo‘ldoshev 1977-yilda Toshkent shahrida tug‘ilgan. 2007—2021-yillarda O‘zbekiston Prezidenti Administratsiyasida turli mas’ul lavozimlarda mehnat faoliyatini olib borgan. 2018-yildan hozirgi kunga qadar, O‘zbekiston Prezidenti Administratsiyasida bank-moliya sohasini rivojlantirish sho‘basi mudiri lavozimida faoliyat yuritgan.

Sarvar Fayzullayev Toshkent viloyati hokimining Ma’naviy-ma’rifiy ishlar samaradorligini oshirish, davlat tili to‘g‘risidagi qonun hujjatlariga rioya etilishini ta’minlash masalalari bo‘yicha maslahatchisi lavozimiga tayinlandi.

Sarvar Fayzullayev 1976-yil Toshkent shahrida tug‘ilgan. 2005—2021-yillarda O‘zbekiston Prezidenti Administratsiyasida turli mas’ul lavozimlarda mehnat faoliyatini olib borgan.

So‘ngi yillarda, ya’ni 2018-yildan hozirgi kunga qadar O‘zbekiston Prezidenti Administratsiyasi kanselyariyasi musahhihlik-tarjimonlik ta’minoti sho‘basining bosh konsultanti lavozimida mehnat qilgan.

Azamat Kamolov Toshkent viloyati xalq ta’limi boshqarmasi boshlig‘i lavozimiga tayinlandi.

Azamat Kamolov 1981-yilda Toshkent viloyati Quyi Chirchiq tumanida tug‘ilgan. 2019-yildan 2021-yilga qadar Toshkent viloyati hokimligida turli mas’ul lavozimlarda, jumladan, Yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha kotibiyati mudiri hamda viloyat hokimligi tashkiliy-nazorat guruhi rahbari lavozimlarida mehnat faoliyatini olib borgan.

Shahzod Normurodov Toshkent viloyati hokimligi yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha kotibiyati mudiri lavozimiga tayinlandi.

Shahzod Normurodov 1994-yilda Samarqand viloyati Ishtixon tumanida tug‘ilgan. Mehnat faoliyatini 2013-yilda “Kamolot” yoshlar ijtimoiy harakati Shayxontohur tumani kengashidan boshlagan, 2014-yildan 2015-yilga qadar “Kamolot” yoshlar ijtimoiy harakati Mirobod tuman kengashi “Kamalak” bolalar tashkiloti raisi lavozimida ishlagan.

Abduhamid To‘laganov Toshkent viloyati “Chirchiq—Ohangaron” irrigatsiya tizimlari havza boshqarmasi boshlig‘i lavozimiga tayinlandi.

Abduhamid To‘laganov 1980-yilda Toshkent viloyati Oqqo‘rg‘on tumanida tug‘ilgan. Mehnat faoliyatini 2001-yilda Oqqo‘rg‘on tumani Akmal Ikromov shirkat xo‘jaligidan boshlagan. 2017-yildan 2018-yilga qadar Oqqo‘rg‘on tuman irrigatsiya bo‘limi boshlig‘i, 2018-yildan 2020-yilga qadar Oqqo‘rg‘on tumanidagi “ABS Oqqo‘rg‘on agro klaster” MChJ agronomi lavozimlarida mehnat faoliyatini olib borgan. 2020-yildan shu kunga qadar Oqqo‘rg‘on tumani irrigatsiya bo‘limi boshlig‘i lavozimida mehnat qilgan.

Avvalroq Monopoliyaga qarshi kurashish qo‘mitasi raisi Toshkent viloyati hokimiga o‘rinbosar bo‘lgani to‘g‘risida xabar berilgandi.

Eslatib o‘tamiz, Xalq deputatlari Toshkent viloyati kengashining navbatdan tashqari 28-sessiyasida Shavkat Mirziyoyev Davron Hidoyatovni viloyat hokimi lavozimiga tavsiya qildi. Toshkent shahar hokimining arxitektura, kapital qurilish va kommunikatsiyalarni rivojlantirish masalalari bo‘yicha birinchi o‘rinbosari lavozimida faoliyat yuritgan Davron Hidoyatov 2020-yilning 30-yanvarida Toshkent viloyati hokimi vazifasini bajaruvchi etib tayinlangandi.

Uning qishloq va suv xo‘jaligi masalalari bo‘yicha birinchi o‘rinbosari lavozimiga Jizzax viloyati Do‘stlik tumani hokimi lavozimida ishlab kelgan Ulug‘bek Uzoqov, shaharlar infratuzilmasini rivojlantirish, obodonlashtirish va kommunal xo‘jalik masalalari bo‘yicha o‘rinbosari lavozimiga Barhayot Meliyev tayinlangan. Yoshlar ishlari agentligi Toshkent viloyati boshqarmasi boshlig‘i lavozimida ishlab kelgan Zuhra Mirg‘oziyeva hokimning yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha o‘rinbosari lavozimiga tayinlangan.