Ispaniya hukumati tashabbuskori Más País partiyasi bo‘lgan to‘rt kunlik ish haftasining sinov loyihasini ishga tushirmoqda. Bu haqda The Guardian nashriga tayanib “RBK” xabar berdi.
Yanvar oyining oxirida partiya yetakchilaridan bir Inyigo Errexo hukumat bilan 32 soatlik ish haftasining sinov loyihasini ishlab chiqish va kelajakda yo‘lga qo‘yish to‘g‘risida kelishib olishga muvaffaq bo‘lganini aytgan edi. Shuningdek, u ish haftasining qisqarishi — bu “bajarilish vaqti kelgan g‘oya” ekanini ta’kidlagan.
To‘rt kunlik ish haftasining yo‘lga qo‘yilishi haqidagi tafsilotlar hali ma’lum qilinmadi. Bunday ish rejimini sinovdan o‘tkazishda bir qancha kompaniyalar, shu jumladan, davlat tashkilotlari va idoralar o‘z ixtiyoriga ko‘ra qatnashadi.
Más País hukumat bilan uch yillik loyiha bo‘yicha kelishuvga erishdi, unga ko‘ra, loyiha, taxminan, 50 million yevroga tushadi va kompaniyalarga qo‘shimcha xarajatlarsiz va ish haqini pasaytirmasdan to‘rt kunlik ish haftasiga o‘tishga imkon beradi. Xususan, taxminlarga ko‘ra, yangicha ish haftasiga o‘tish chiqimlari davlat tomonidan birinchi yil 100 foiz, ikkinchi yil 50 foiz, uchinchi yil 33 foiz qoplanadi.
Más País a’zosi Ektor Texeroning so‘zlariga ko‘ra, dastlabki hisob-kitoblarga ko‘ra, xodimlari soni 3 mingdan 6 ming kishigacha bo‘lgan 200 ga yaqin kompaniya sinov loyihasida ishtirok etishi mumkin. Loyiha 2021-yilning kuz faslida ishga tushirilishi kerak.
Avvalroq ish haftasi eng qisqa mamlakat nomi e’lon qilindi. Iqtisodiy hamkorlik va rivojlanish tashkiloti (OECD) statistikasi Niderlandiyada eng qisqa ish haftasi joriy qilinganini ko‘rsatdi. Nashrning ma’lumotlariga ko‘ra, mamlakatda ayollar bir haftada o‘rtacha 25 soat, erkaklar esa 34 soat ishlaydi. Ya’ni mahalliy aholi haftasiga o‘rtacha 29 soat mehnat qiladi, bu esa to‘rt ish kuniga to‘g‘ri keladi.
Izoh (0)