Jizzaxda mast haydovchi boshqaruvidagi Nexia qarama-qarshi yo‘lda harakatlanib, YPX evakuatori bilan to‘qnashdi

Jizzaxda 18-fevral kuni qarama-qarshi yo‘lda harakatlanib kelayotgan mast haydovchi YPX inspektori mashinasi bilan to‘qnashdi, deya xabar qilmoqda YHXBB.

Ma’lum qilinishicha, 18-fevral kuni tungi soat 02:00 atrofida Jizzax shahri Sharof Rashidov shoh ko‘chasida qarama-qarshi yo‘nalishda harakatlanib kelayotgan Nexia avtomashinasini ko‘rgan yo‘l-patrul xizmati inspektori unga to‘xtash ishorasini bergan.

Haydovchi qaysi yo‘nalishda harakatlanib ketayotganligini bilmagan, ya’ni o‘zining xatti-harakatlarini anglay olmagan darajada mast holatda bo‘lgan.

O‘ziga xizmatda foydalanish uchun berilgan evakuatorda transport vositasini jarima maydoniga qo‘yib qaytayotgan yo‘l-patrul xizmati inspektori qarama-qarshi yo‘nalishda harakatlanib kelayotgan mashinani ko‘rib, ovoz chiqaruvchi moslama va yoritish chiroqlari yordamida to‘xtash ishorasini bergan.

Biroq Nexia haydovchisi ko‘rsatilgan belgilarga qaramay, YPX inspektori avtomobiliga kelib to‘qnashgan.

Mazkur holat yuzasidan tegishli tartibda hujjatlar rasmiylashtirilgan.

Bundan avval Farg‘onada Matiz daraxtga urilishi oqibatida haydovchining 1 yoshli qizi vafot etgani, Navoiyda mast haydovchi boshqaruvidagi Lacetti YPX posti oldida avariyaga uchrab, yonib ketgani hamda Farg‘onada “Jiguli”ning kanalga tushib ketishi oqibatida 3 kishi halok bo‘lgani haqida xabar berilgandi.