Bugun,

  • USD 11095.31
  • RUB 173.84
  • EUR 10772.44

Toshkentda 6 kun davomida 3 marta YPX xodimiga pora taklif qilish holati aniqlandi, deya xabar qilmoqda Ichki ishlar vazirligi YHXBB matbuot xizmati.

Qayd etilishicha, 2021-yilning 4-fevral kuni Toshkent shahar IIBB YHXB YPX xodimi Sh.Hikmatov Chilonzor tumani Cho‘ponota ko‘chasida olib borgan xizmati davomida Lacetti rusumli avtomobilni to‘xtatib, tegishli me’yoriy hujjatlarini tekshirish vaqtida haydovchi, 1990-yilda tug‘ilgan S.M.dan spirtli ichimlik hidi kelganligi bois mastlik holatida gumonlangan va haydovchini tibbiy ko‘rikdan o‘tishga taklif qilgan.

Haydovchi tibbiy ko‘rikdan o‘tishdan bosh tortganligi bois unga nisbatan Ma’muriy javobgarlik to‘g‘risidagi kodeksning 136-moddasi (transport vositalari haydovchilarining va yo‘l harakati boshqa ishtirokchilarining mastligi yoki mast emasligini aniqlash uchun tekshiruvdan o‘tishdan bo‘yin tovlashi) tartibida xolislar ishtirokida bayonnoma rasmiylashtirilgan.

Shundan so‘ng fuqaro rasmiylashtirilgan ma’muriy bayonnomani bekor qilishni so‘rab, YPX xodimiga 200 AQSh dollari miqdorida pora taklif qilgan. YPX xodimi mazkur holat yuzasidan shahar IIBB boshlig‘i nomiga bildirgi orqali murojaat qilib, fuqaro S.M.ga nisbatan belgilangan tartibda chora ko‘rilishini so‘ragan.

Xodimning bildirgisi asosida huquqni muhofaza qiluvchi organ xodimlari tomonidan o‘tkazilgan tezkor tadbir davomida fuqaro S.M. 200 AQSh dollari miqdoridagi pullarni pora tariqasida YPX xodimiga bergan vaqtida daliliy ashyo bilan qo‘lga olingan.

Ushbu holat yuzasidan Toshkent shahar Chilonzor tumani prokuraturasi tomonidan dastlabki tergov harakatlari olib borilmoqda.

Shuningdek, 2021-yilning 5-fevral kuni Toshkent shahar IIBB YHXB YPX inspektori D.Hikmatillayev Bektemir tumani Husayn Boyqaro—Ohangaron ko‘chalari kesishgan chorrahada xizmat olib borayotgan vaqtida, tungi soat 00:30 larda Captiva rusumli avtomobilni to‘xtatgan.

Tekshirish davomida mazkur avtomobilning yon old va orqa oynalari tusi ruxsatsiz o‘zgartirilib, qora plyonka yopishtirilganligi aniqlangan. Haydovchiga nisbatan o‘rnatilgan tartibda ma’muriy bayonnoma tuzilib, avtomobil vaqtincha saqlash uchun jarima maydonchasiga joylashtirilgan.

Shundan so‘ng avtomobil haydovchisi F.Sh.ning Suxrob ismli tanishi kelib, mazkur holat yuzasidan to‘ldirilgan ma’muriy bayonnomani bekor qilish va transport vositasini jarima maydonidan olib chiqish evaziga 200 AQSh dollari miqdoridagi pullarni pora tariqasida taklif qilgan.

YPX xodimi mazkur holat yuzasidan shahar IIBB boshlig‘i nomiga bildirgi orqali murojaat qilib, belgilangan tartibda chora ko‘rilishini so‘ragan.

Xodimning bildirgisi asosida huquqni muhofaza qiluvchi organ xodimlari tomonidan o‘tkazilgan tezkor tadbir davomida Suxrob ismli fuqaro YPX xodimiga 100 AQSh dollari miqdoridagi pulni pora sifatida bergan vaqtida daliliy ashyo bilan ushlangan.

Mazkur holat yuzasidan Iqtisodiy jinoyatlarga qarshi kurashish departamenti Bektemir tumani bo‘limi tomonidan tergovga qadar tekshiruv harakatlari olib borilmoqda.

Ta’kidlanishicha, Toshkent shahrida YPX xodimiga pora berish holatining navbatdagisi 2021-yilning 9-fevral kuni yana takrorlandi.

Toshkent shahar IIBB YHXB YPX katta inspektori U.Ishanxo‘jayev 2021-yilning 8-fevral kuni Mirobod tumanidagi Taras Shevchenko ko‘chasida soat 21:00 larda Mercedes-Benz rusumli transport vositasini to‘xtatib tekshirganda, avtomobilning yon old va orqa oynalari tusi o‘zgartirilib, qora plyonka yopishtirilganligi va maxsus ruxsatnomasining qalbaki ekanligi aniqlangan.

Haydovchi S.G‘. avtomobilni jarima maydonchasiga joylashtirmaslik evaziga YPX xodimiga 100 AQSh dollari miqdoridagi pulni pora tariqasida taklif qilgan.

YPX xodimining belgilangan tartibdagi bildirgisi asosida sohaviy xizmat vakillari va xolislar ishtirokida tezkor tadbir o‘tkazilib, fuqaro S.G‘. 100 AQSh dollari miqdoridagi pulni YPX xodimiga bergan vaqtida daliliy ashyo bilan ushlangan.

Mazkur holat yuzasidan Iqtisodiy jinoyatlarga qarshi kurashish departamenti Mirobod tumani bo‘limi tomonidan tergovga qadar tekshiruv harakatlari olib borilmoqda.

Bundan avval Toshkent viloyatida mashinasini jarima maydonidan chiqarib berishni so‘rab, YPX xodimiga 1,5 million so‘m pora taklif qilgan haydovchi ushlangani hamda Gulistonda jarima maydonchasidan mashinasini chiqarib berishini so‘rab, YHXB xodimiga pora taklif qilgan haydovchi qo‘lga olingani haqida xabar berilgandi.

Izoh
Asosiy yangiliklar
Dunyo
General Pyotr Pavel Chexiyaning yangi prezidenti etib saylandi
Dunyo
Amerikadagi rus mafiyasi boshlig‘iga aylanib, Rossiyada o‘lim topgan “qonundagi o‘g‘ri” — “Yaponchik”. Kun xronologiyasida 29-yanvar
Mahalliy
“O‘tgan yil davomida ichki ishlar xodimlari bilan bog‘liq 644 ta salbiy video tarqalgan” — Shohrux G‘iyosov