Qarshida qizning telefon so‘zlashuvini qarindoshlariga jo‘natish bilan qo‘rqitib, uning onasidan 1000 dollar talab qilgan yigit ushlandi
Qashqadaryo viloyatining Qarshi shahrida qiz tanishining telefon so‘zlashuvini qarindoshlariga tarqatish bilan qo‘rqitib, uning onasidan 1000 dollar talab qilgan yigit qo‘lga olindi, deb xabar beradi Tergov departamenti.
Ma’lum qilinishicha, I.Q. ismli fuqaro Qarshi shahar IIO FMB boshlig‘i nomiga ariza bilan murojaat qilib, 21 yoshli Sh.X. uning qizi S. bilan telefon orqali bo‘lgan so‘zlashuvlarini yozib olib, qarindoshlariga tarqatmaslik evaziga 1000 AQSh dollari miqdoridagi pullarni talab qilayotganligini ma’lum qilib, unga nisbatan qonuniy chora ko‘rishni so‘ragan.
I.Q.ning murojaati yuzasidan IIB xodimlari tomonidan o‘tkazilgan tezkor tadbirda 9-fevral kuni Sh.X. tovlamachilik yo‘li bilan I.Q.dan qizi S. bilan o‘rtalarida bo‘lib o‘tgan so‘zlashuvlarni yaqin qarindoshlariga tarqatmaslik evaziga maxsus kimyoviy ishlov berilgan pullarni olgan vaqtida ushlanib, ushbu pullar ashyoviy dalil tariqasida rasmiylashtirilib olingan.
Mazkur holat yuzasidan Qarshi shahar IIO FMB huzuridagi tergov bo‘limi tomonidan Jinoyat kodeksining 165-moddasi 1-qismi (tovlamachilik) bilan jinoyat ishi qo‘zg‘atilgan. Hozirda tergov harakatlari olib borilmoqda.
Avvalroq Namanganda fuqaroning o‘zga bilan janjallashgani aks etgan videosini internetda tarqatmaslik evaziga undan 100 dollar talab qilgan shaxs ushlangani, Samarqandda 43 yoshli tanishining suratlarini internetda tarqatish bilan qo‘rqitib, 2200 dollar talab qilgan ayol qo‘lga olingani to‘g‘risida xabar berilgandi.
